日式恐怖 Game 總係有種特別嘅魔力，好似《零》系列咁就一直不乏捧場者。今年年頭時喺 Steam 上面曾經推出一隻日式恐怖遊戲《影之迴廊》（シャドーコリドー影の回廊），推出後至今仍然係「極度好評」評價，而日前本作正式登錄 PS Store，成為本年度最後一隻恐怖遊戲。

《影之迴廊》係一款日式恐怖遊戲，使用 Unreal Engine 4 製作，採用第一身視點。故事「表面上」係講述某日玩家被捲入一個神秘場所，入面嘅走廊行極都有兼且有怪物徘徊，於是就被逼係咁嘅環境中四處游走並搵出返回現實嘅方法。

遊戲嘅流程主要都係於隨機生成嘅地圖中，尋找道具「勾玉」，然後放置於祭壇中。講就好似好簡單，但遊戲中玩家係並無攻擊手段，即係見到怪物追你就只有逃跑一途，又因為每一種怪物嘅躲避方式都有所不同，種類數量又多，的確頗有難度。另外因為地圖係隨機生成，加上有極多隱藏要素、解謎，令到遊戲可玩性極之高。

《影之迴廊》已於日本 PS Store 上推出，售價 $1,980 日圓。另外本作仲有 Nintendo Switch 以及 PC 版本。

回帶相關文章：

【能面怪物】Steam 上超好賣日式傳統恐怖遊戲《影廊 Shadow Corridor》幾乎一人包辦所有製作