《碧藍幻想 Relink》喺 2016 年啱啱公佈時，因為係同遊戲業界品質保證嘅白金工作室聯合開發，加上《碧藍幻想》嘅高人氣，的確引起玩家們極大注意。但自今年年初 Cygames 同白金雙方宣布結束合作後，就無乜聲氣令人頗為擔心。不過啱啱上星期喺日本舉行嘅「GRANBLUE FANTASY FES 2019」入面，釋出 《碧藍幻想 Relink》最新宣傳影片以及首次有實機戰鬥畫面，質素令人滿意！

《碧藍幻想 Relink》（日語：グランブルーファンタジー Relink）改編自 Cygames 旗下極受歡型手機遊戲《碧藍幻想》，與原版雖然系統同及遊玩方式都著截然不同，但仍然保留手機版極之華麗嘅美術風格。遊戲現時 Cygames 團隊開發，屬動作角色扮演，採用第三身視點。

今次釋出嘅宣傳片主要係演示遊戲可四人聯機以及暫時可用角色，分別有格蘭（グラン）、卡塔莉娜（カタリナ・アリゼ）、拉卡姆（ラカム）、伊歐·由克里斯（イオ・ユークレース）、雙龍騎士蘭斯洛特（ランスロット）、維恩（ヴェイン）、炎帝帕西瓦爾（パーシヴァル）、齊格菲（ジークフリート）等八人。

至於首次釋出嘅四人共鬥實機遊玩片就有大量本作戰鬥系統等資訊。畫面中見到按鍵分別有攻擊、特殊攻擊、跳躍、連結攻擊、技能、回避、防禦及 Lock 鍵，而使用技能需要先按 R1 技能鍵再按 正方圓圈果堆制，另外奧義槽滿咗後可以按 L3+R3 發動。另外演示片段中，角色要攻擊判定發生後先可以用回避，意味面對高階敵人時要小心攻擊時機，並非無雙式無腦劈。

影片所見關卡開始後並非直接打王，而係要清下小怪收集下寶箱先，可以藉呢段路先儲奧義等打王時一開波就有得用。去到 Boss 戰「遠古巨龍」亦有唔少資訊，例如巨大敵人好似《Monster Hunter》咁各部位防禦力有分別，打頭會扣多啲，打手就扣少啲。另外同手機版一樣，Boss 有 OD（OVERDRIVE），類似怒氣值，當 Boss 處於該狀態下攻擊力會上升、可發動特殊技能。而喺 OD 狀態下，Boss 受到攻擊會減少怒氣值，到底時會變成虛弱狀態同時倒地，亦即係 BD（BREAK DOWN），此時玩家可放題。

OD（OVERDRIVE）狀態下攻擊力會上升、可發動特殊技能

BD（BREAK DOWN）即放題狀態

維恩防禦技能，原地產生護盾並抵擋敵人攻擊，坦技

Boss AOE 攻擊極之精彩！

《碧藍幻想 Relink》仍未公開發售日期，對應平台為 PS4 / PC。