話說 LEGO Hidden Side 出左之後，見好多香港玩家都得個儲字，砌完就擺靚靚就算，完全忘記左佢嘅 AR 互動遊戲。喺第一季產品嘅試玩會度，我地都問過官方係著意推行多人合作模式。而 2020 嘅 LEGO Hidden Side 產品，全部 6 款都確定可以多人合作，而且仲可以 Online 一齊捉鬼！咁作為父母嘅，就可以拎埋自己部手機同仔女一齊玩啦！

「獵人」嗰邊嘅玩法嚟多人遊玩之後同依家嘅冇大分別；「幽靈」模式嘅玩法就變左 2 vs 1，其中一個玩家就變左之前電腦控制嘅幽靈獵人，拎住巨型手機捉晒啲鬼出嚟！(呢個模式啱晒網上捉鬼黨玩)

不過作為父母嘅都唔洗擔心仔女 Online 同其他陌生人玩嘅時候，會遇到啲網上欺凌或者詐騙之類情況發生，事關 Online 多人合作模式係冇語音同文字溝通功能，玩家只能夠使用遊戲提供嘅 Emoji、貼紙或者短句去互相溝通，咁當然佢地用其他社交平台或者軟件一齊玩就另計啦！

LEGO Hidden Side 2020 產品最快會喺 12 月 27 號發售，而已經發售中嘅 2019 Hidden Side 產品嘅多人遊玩模式會喺 2020 年年初先會開始逐步加入。

資料來源：LEGO