耶穌大戰佛祖格鬥遊戲大家聽得多，今日同大家介紹多隻耶穌主題遊戲，名為《I Am Jesus Christ》，預定 2023 年 Q2 正式推出。（2022/11/16 更新：遊戲定於 2022 年 12 月 1 日先行推出先導版《I Am Jesus Christ: Prologue》，對應平台為 Steam ）

《I Am Jesus Christ》由 PlayWay S.A. 發行，而 PlayWay S.A. 咁耐以黎都發行唔少模擬類型嘅遊戲，例如係《Thief Simulator》要玩家扮賊、《Cooking Simulator》要玩家做廚師；而今次嘅《I Am Jesus Christ》當中，玩家將會飾演「耶穌」到處施行神蹟打救世人。

就算係唔係基督教徒，相信大家有聽過耶穌嘅故事，於遊戲入面，玩家就要用你嘅神力，周圍去幫人救人，令佢地「蒙神感召」受感動而成為你嘅信眾。

遊戲裡面可以進行嘅奇蹟體驗共有三十幾種形式，例如幫阿婆醫病、大玩五餅二魚、叫停風暴、仲有驅鬼打撒旦，全部都係《聖經》裡面有記載過嘅故事。

不過，喺遊戲中入面嘅穌哥，你嘅神力係有限的，神力就等同你嘅生命值，用哂啲神力就要釘十字架 GG 了；不過話哂都係神，三日後復活就係一條好漢，死過返生就會神力重新充值，又可以再戰江湖！

《I Am Jesus Christ》對應 Steam 平台，2022 年 12 月 1 日推出「Prologue」先導版，正式上架日期有待公佈。