《刀劍神域》最新手機遊戲《Alicization Rising Steel》（日版名為 Alicization Blading）已經開始營運數日，作為《SAO》Fans 嘅我當然即時開始進行遊戲「Link Start」（誤）。

《SAO》咁多年黎，喺家用機以及手機平台都推出過唔少遊戲，不過風評就唔算特別出色，玩家評價大多為「要 Fans 好有愛先會玩爆機」……呢句評語，我認為可以繼續套用到今次呢隻《Alicization Rising Steel》上面。

《Alicization Rising Steel》其實整體做得好用心，無論係畫面，或者過場動畫，以及劇情還原，相信未睇過原作嘅朋友都可以完全理解哂《Alicization》篇章嘅故事。遊戲仲有全新主題歌同埋 Opening MV，Fans 表示嗚呀。

不過我亦問過一啲無睇／唔係《SAO》Fans 嘅朋友，佢地就話對呢個遊戲唔算太大興趣，畢竟遊戲係 Fans Oriented，吸引新玩家落坑就似乎有難度了。

因為好快會見唔到優吉歐，比我 Cap 多兩張佢嘅圖

成為上級修劍士，即係離重點劇情不遠了……

不過，呢隻遊戲真係好肝，首先故事篇幅長，同時遊戲會有定期活動，亦會有仿 PVP 形式嘅玩家對戰；不過，敵人都厚血的，遊戲並唔能夠「無雙」咁樣轆過去就算，玩家需要切切實實地練 Level 強化角色，先可以完成任務。

與玩家非即時對戰：到底係我無時間打機，定係其他玩家嘅愛比我深？咁高 Level…

遊戲裡面買石唔算貴，同埋官方送石算大方。不過，一次十抽需要 250 石，而中到四星角色以及四星武器嘅機率，真係非常低……。

我喺編輯部裡面一向有歐洲人之稱，但係，玩左遊戲三數日，抽過幾次角，都係得三星角，最好嘅一次結果係中左優吉歐把「藍薔薇之劍」……我懷疑我已經用盡我喺《Alicization Rising Steel》裡面嘅運氣……

抽到四星角好難，但係，唔代表四星角就馬上無敵。呢個遊戲，強化角色及裝備係好重要的，係令能力值提昇嘅最主要一環。想升級就要刷關卡，所以我先話呢個遊戲好肝。

角色各有唔同技能以及劍技，右下角灰框「心意值」滿左就可以出超必。對於 Fans 黎講，可以見到角色重現一啲經典招式係開心嘅。

同埋，遊戲系統都算佛心，戰鬥可以 Auto，劇情可以 Skip，所以大家就算做緊其他野，有體力嘅，可以開住遊戲黎掛機刷關卡；例如我寫緊呢篇分享嘅同時，我一樣係掛緊機（老總你見到當見唔到啦！）

如果你係《SAO》Fans，呢個遊戲算係不過不失，未至於非玩不可嘅，但係如果你同我一樣，工作時間想搵隻 Game 黎掛下機，又想遊戲有啲難度嘅話，呢隻《Alicization Rising Steel》都係近期唔錯選擇黎嘅！