大家仲記唔記得無耐之前有隻叫做《光復香港》（Liberate Hong Kong）嘅遊戲，模疑抗爭者於前線所見所聞。遊戲早於今年 8 月底進行開發，並預計於 11 月左右登上 Steam。遊戲於早前已經完成，並有部份媒體得到試玩版遊戲。有幸 VJGamer 亦得到該試玩版，並同製作團隊有一簡短訪問，深深感受到團隊對香港之熱愛及其覺悟。

《光復香港》（Liberate Hong Kong）係一隻第三身視點遊戲，支援 VR。不過團隊早就講明希望大家唔好將佢視之為一隻「遊戲」，而係用遊戲形式提供場景重現嘅沉浸式體驗（immersive experience），簡單講就即係希望比大家體驗作為前線衝衝子所面對嘅境況。

遊戲中玩家將扮演前線衝衝子，喺前線面對一班癲狗（香港警察）嘅各種攻擊，而我方係並無任何攻擊手段，只有防守一途，最盡都係執地上面催淚彈掉返轉頭。而玩家所控制角色雖然手上有路牌盾，但其實並無任何防禦力，面對極之不對稱武力只有捱打，而且仲有「中彈」、「被捕」等等失敗條件。而呢種只有捱打並隨時面臨死亡嘅情況，正正就係我哋前線一班學生、平民所面對嘅恐懼。

其實唔應該叫做催淚彈，根本就係化學武器

對住手無寸鐵嘅學生、平民發射實彈，呢個唔係遊戲先會出現嘅情節，係我哋香港人正面對嘅現實

子彈於頭上飛過時聲音非常真實

最多都係掉返地上面嘅催淚彈過去，實際上有無用？你覺得呢？

遊戲現時內容其實只係一直重覆被射催淚彈、蹲下躲避子彈、逃避警狗追捕，比盡只有五分鐘時間體驗，但其實製作團隊對呢個作品好有期望，亦都有說話想對香港人講。

「我哋最想俾外國人體驗我哋喺前線嘅感覺，並成為國際文宣。遊戲其實已經完成，佢只係一個五分鐘嘅體驗，並唔係外界猜測嘅有故事、任務模式。我哋製作遊戲嘅原意並唔係著重遊戲嘅本身，而係公布遊戲後對世界嘅影響，例如新媒體文宣，吸引外國 YouTuber 試玩。可以幫香港繼續成為世界嘅焦點，輸出革命。此外，Steam 上架，相信好多人都知道背後嘅用意。世界開始關注到跨國企業，如 NBA、Vans、暴雪等，因為金錢而討好權貴，而無視言論自由。
我哋再次強調遊戲係嚴肅，而唔係玩樂，更唔係要訓練大家上前線或對前線有任何意見。團隊亦都好想為整場運動製作一個遊戲，但絕對係重光之後嘅事。」

每日都上演緊呢個畫面，希望大家嚴肅看待呢隻作品，並非一隻遊戲

另外佢哋亦都有提到 Steam 方面對遊戲上架並未有任何回覆，但團隊其實早就有應對方案，萬一 Steam 真係無視佢哋，遊戲將會直接放出黎比大家下載。而且團隊透露對 Steam 放行並不樂觀，已經預咗 Valve 會冷處理，最差情況係 Valve 跪低，但當發生呢個情況等同向世界證明中國嘅威脅，所以為咗呢場運動就算要冒險亦要行呢步。又由於遊戲題材敏感，加上 Steam 其實頗為睇重中國市場，Valve 跪低並非無可能。一但跪低，申請人嘅資料好可能會被供，所以存在一定風險，團隊嘅付出真正值得我哋尊敬。

Steam 頗為睇重中國市場

《光復香港》（Liberate Hong Kong）電腦版會開放免費下載，鼓勵大家體驗前線情況，現時已於 ITCH 上架。《光復香港》提供最真實同時最絕望嘅前線體驗，現階段內容雖然單調，但係製作團隊話預計當香港重光後，團隊會研究遊戲 update，以及為整場遊戲製作一隻遊戲，作為VJGamer 編輯團隊、一個香港人，我地衷心希望可以等到呢個更新，光復香港 時代革命！

《光復香港》ITCH 傳送門