文長，涉及劇透，總結在最尾，想睇評分可直接跳到最後。

《The Outer Worlds》頂住《Fallout: New Vegas》開發廠商既名號，加上以原《Fallout》創作人團隊做賣點，係推出之前更加被 Microsoft 收購，對外界玩家而言，可謂如夢幻般既《Fallout》精神續作！

實際上，有跟開多少少 Obsidian 既新聞就會知道，其實呢間公司本身內部存在唔少問題，係《The Outer Worlds》既開發同推出期間，亦有不少主要既團隊成員出走。

真係作為 RPG 迷既讀者觀眾，再睇埋隻 Game 本身既宣傳／試玩影片，其實期望值一向唔算高。但亦正因為期望本身唔算高，所以佢最後出到來能夠係一隻正正常常既普通遊戲，都算令人心懷安慰……….（係架，其實我預計佢好大機會大爆死架，未聽過呢個觀點呢…….）

呢篇文章題為「妥協的藝術」，亦都係《The Outer Worlds》成隻Game 既主旨，我地跟住來睇下佢係遊戲既各個方面點妥協法。

畫面及地圖

雖然唔知係咪呢個原因，但我又真係走去 Search 過，用 Unreal Engine 4 整既開放世界遊戲冇一個有好下場。當然亦有可能係資金或者係製作組使用 Unreal Engine 既經驗問題，總之《The Outer Worlds》係冇開放世界，同時畫面亦只有中規中矩。

呢個係遊戲既第一個妥協，因為做唔到，或者唔想冇好下場，所以唯有妥協。如果遊戲宣傳做《Fallout》既精神續作，咁佢冇可能原本設計既時候冇諗過做開放世界遊戲，但最後既考慮肯定係玩家係咪一定需要更加好既畫面同埋一定要連接住既開放世界地圖先可以享受到遊戲？其實唔係，最後既產物就變成咁。

其實 2019 年來講，入屋仲要 Load 地圖既大型遊戲已經好少，雖然唔會好嚴重咁影響遊戲體驗，但下次最好唔好啦。

遊戲及任務設計

由開放世界既地圖，可以引申到遊戲既設計。失去左開放世界，意味住遊戲少左好多比玩家純粹探索既地方，又或者係隨機遭遇既事件等等，確實係減少左 RPG 世界既 Immersion。再加上極其有用而又詳細既地圖，玩家今次要自己搵齊哂所有野，係一定會搵到。

其次就係任務設計上放棄左《Fallout: New Vegas》最引以為傲既人物關係任務網設計。《FONV》既時候，玩家經常會不經意咁接觸到唔同既 NPC，當佢係 A 先啦！咁佢會比個任務你，仲會叫你比佢入隊添。然後玩家再行行下，佢會見到世界上既不同人對於A 既睇法，而A 又會對你做某 D 任務有唔同睇法（呢個《The Outer Worlds》都有）。

再行行下，玩家又會見到另一班人，突然佢就開始打你，因為 B 組織既仇人就係 A，而你係唔會知。係幫 A 殺人同埋交人出去換取 B 組織既聲望之間，你要作出選擇。但 A 同 B 本身自己再干涉於遊戲世界既種種關係係冇人可以估計到，因為正如設計所言，成個世界既人物關係係一個網絡，牽一髮而動全身。

但係《The Outer Worlds》入面，所有任務同支線都好獨立，好局部，九成九只會影響某一個區域或者某一個組織既聲望，而所有勢力或者地圖既最後結果，都同你最後完成遊戲既最後結果冇影響（除非佢會有第二集讀返個 Save 啦）。甚至所有隊友都對所有既組織及勢力政治中立既…….

本身對描寫世界觀同埋隊友角色既本身都有窒礙，成件事對比起《Fallout: New Vegas》真係闇然失色。

咁呢個犠牲又妥協左啲咩？《The Outer Worlds》係 Obsidian 其中一隻最少 Bug 既遊戲。

Obsidian 既前身係 Black Isle，即係原《Fallout 1＆2》既製作公司，同時係江湖人稱「BUG 中之霸」！

好多人對《Fallout 1＆2》本身充滿無可比擬既情懷，信奉到宗教咁樣。但玩過原版既人就會知《Fallout 1＆2》係 Bug 到冚家產既作品。佢既神話係因為故事既吸引力，戰鬥／技能系統既創新，黑色幽默，玩家自由度等等令人難以忘記。及後被一直到現在既遊戲開發者同遊戲記者推崇至今，因為業界最有力果兩類人都鍾意，咁佢又點會唔係神話？

事實上 Obsidian 即使係之後幫人代工既作品，例如《Star Wars: Knight of The Old Republic 2》《Fallout: New Vegas》等等。雖然係同一個引擎上將本來既遊戲以及任務系統做好大既擴充同埋改善，係故事上上更加將人地本來個 Franchise 提升上另一個層次，但係同時都係 Bug 到你老母閪冚家產。

呢廿幾年來，Bug Isle, Bugsidian 既名號不絕於耳。如果你有玩過 Xbox 360 版既《FONV》，其實到今時今日都係未整好哂啲BUGS，能夠平平安安咁完成遊戲既人，係極少數極少數。

到現在，Obsidian 自己既《Tyranny》《Pillars of Eternity 2》都相繼賣得唔好，係咪仲一定要堅持整好複雜，好豐富既技能系統？任務網絡？NPC 關係？開放世界？定係做好自己既本份，減少左啲 Bugs 先，等大家可以完完整整咁，起碼完成呢個遊戲？

Obisidian 選擇左呢個妥協。

故事

《The Outer Worlds》既故事入面，充滿左妥協。當然，正如宣傳片所講，《The Outer Worlds》既冒險者可以自己揀做或者唔做或者點樣做所有既決定。或者有好多人會因為遊戲入面既角色既性格，或者係組織背後既理念，或者想打造主角成為某一種人而去做出某種決定。但罕見地《The Outer Worlds》今次大部份既決定都有中庸妥協既選項。

例如第一章 Edge Water。表面上你需要係 The Board 既爪牙同埋響往自由，自給自足既園藝家之間做選擇，但其實你亦可以幫助佢地妥協，令全部人有飯食之餘，同時將不必要既鬥爭減到最少。

劇情推進少少，Monarch 星球上既自由戰士自成一國，一邊瘋狂做文宣拉人入會，一邊開口埋口都話要打聖戰，要將奉行資本主義既企業城市打倒，要解放人民乜乜乜…….

但現實大家都明白，無論係邊個要消滅邊個，最後大家都係為左爭奪個爛鬼星球上面果少少僅有既資源。如果有一個大家都有飽飯食，同可以繼續發展既方法，其實妥協都唔係難以達成既目標，畢竟聖戰士都要開飯架嘛。

自由當然好寶貴，但追求自由唔一定就係正義。《The Outer Worlds》入面有好多習慣依附係體制之內生存既人。如果冇左體制所帶比佢既秩序同埋好處，佢地生存唔到落去。而又，如果人人平等，咁依附體制既人同追求自由既人都係生命，沒有誰比誰高尚。

直至 The Board 要求我親手屠殺 Edge Water 既自由派之前，我一直嘗試保持妥協。自由同體制之間必需要保持微妙既平衡，即使係自由戰士，如果冇自己既規條，都生存唔到落去。

整個遊戲之中，我極力保持住最多人生存，想像住最美好既結局。我唔會一句話自由萬歲就去殺哂所有企業既代表。如果所有人都可以自給自足，企業同聖戰士都可以攜手合力咁生存落去，或者The Board 都可以同其他理念既派系妥協，停止鬥爭。

直至佢地表示︰唔會。

Halcyon 殖民地處於一個絕望既境地，而最絕望既唔係Halcyon 既人會死哂，而係地球本身渺無音訊。Halcyon 既政局，好大程度反映當時既人類社會大致點運作，係用資本主義運行既社會主義之中，貧富懸殊越來越嚴重，越來越多人受到生存既威脅，地球上面既人類社會可能已經因為不肯妥協而崩塌，甚至乎急於殖民到銀河系邊緣既殖民企業領袖，本來就係為左避開呢場災難。

我作為主角，為左令各方勢力妥協，奔走左整個遊戲。為左令最多人可以生存，我施展渾身解數。最後 The Board 堅持要我切除所謂資本主義體制既腫瘤，自給自足唔會依附 The Board 既人，佢地控制唔到。

任由佢地獨立既話，好快其他人就會意識到係呢個殖民地即使唔依附體制都可以自立，好快 The Board 係整個殖民地就唔會有影響力，好快……佢地就冇可以欺壓既對象。

但佢地追求自由獨立既原因就係因為 The Board 管理不善，佢地為左生存先另覓他法，咁都唔得？而且解決問題既方法唔係應該將你地搜刮囤積既資源分比佢地咩？如果大家係體制內都可以生存，邊個得閒搞獨立？

The Board 表示，咁唔得。呢個殖民地本身就已經欠缺資源，係科學可以解決呢個問題之前，我地必需要有系統咁管理好我地現有既野。The Board 既存在係為左解決問題，係有答案之前，我地必需要先解決提出問題既人。

地球已經唔可以再幫到我地，我地已經搵左科學家去改變人類既基因，適應呢個殖民地既環境，如果唔係咁既話，無論你生活得自唔自由，最後大家都會死。而要推進呢個科學既進程，咁我地必需要集中僅有既資源，換言之資源唔可以分散同埋分享，所以唔可能容許獨立派系既存在。而家我地請你去屠殺 Edge Water 既自由主義者。

我當日救佢地，唔係為左你可以叫我去屠殺返佢地………….我相信係妥協同合作之中，我地仍然可以生存落去。如果用對話唔能夠令當權者、既得利益者放下權力以及資源，去同其他派系作出妥協既話……咁我唯一既選擇就係用子彈。

相比起例如《The Witcher 3》《Fallout 4》等等用左成個開放世界同佈滿成個開放世界既支線來講解世界既背景同最後要你做出選擇。《The Outer Worlds》既故事同世界觀簡潔得來有力，而且充滿情感，令人留下深刻印象。Obisidian 作為最強寫作能力既 RPG 廠商之一，地位仍然無法動搖，今次就寫出妥協的藝術。