由 Level-5 工作室開發嘅《二之國》系列新作，居然係推出 MMORPG 手機遊戲！呢隻名為《二ノ国：CROSS WORLDS》嘅遊戲，由 Level-5 與韓國遊戲開發商 CJ Netmarble 共同開發，主要製作團隊為曾開發《天堂 2：Revolution》嘅成員，遊戲亦會以 UE4 去製作。預計 2020 年下半年正式開始營運。

《Cross Worlds》裡面，玩家飾演嘅主角，參加左「一之國」大企業ミライカンパニー開發嘅虛擬現實計劃「Project N」，於眾多競爭者中脫穎而出，成為計劃嘅測試員（件事好《SAO》），被傳送到「二之國」，去保護同埋強化你所屬嘅國家。

玩家於遊戲中目前可選擇嘅職業分別為「弓箭手」「破壞者」「女巫」「工程師」以及「劍士」，而遊戲採用即時戰鬥模式，戰鬥種類亦有分為 PvP 公會戰、攻城戰等，玩法黎講係豐富的。故事主線方面就會係 PvE 形式，官方已表明會定期推出限定「降臨」戰，聽落會係一個幾「肝」嘅遊戲。

《二之國》一向以精緻動畫以及優美音樂而著名，所以今次《Cross Worlds》裡面亦會起用原作裡嘅部份音樂，相信 Fans 會份外感到親切感。

題外話：劍士造型好似《哈爾移動唔到城堡》嘅哈爾啊！

《二之國》系列裡面嘅「城鎮強化」一向係重點玩法之一，不過將呢個遊戲系統變成 Online Game 到底係唔係好嘗試，相信要有待正式版推出先能夠落定論了。雖然係手機遊戲，但係目前正式登錄平台係未有正式公佈的，有新消息會再同大家跟進。