中國對人民實施嚴格監管係世界所共知，我地香港持續四個月嘅示威其中一個主因都係因為對中國嘅管治感到恐懼、憤怒。最近中國又有新招對付人民，就係利用《關於防止未成年人沉迷網路遊戲的通知》六大措施，對未滿 18 歲嘅玩家實行「網路宵禁」，並要求遊戲企業嚴格遵守。而喺大陸你唔聽黨指示代表啲咩，相信大家都知道。

雖然講係六大措施，不過最「辣」嘅都係頭三條。第一條就係要求嚴格實施「實名制」，所有網絡遊戲均需用實名登記，即係你走場都會有根有據知你係邊個。第二條就仲誇張，明確規定遊戲企業於晚上 10 點至上午 8 點呢段時間不能提供遊戲服務予未成年人，並且每日不得遊玩超過個半鐘，如果係假日嘅話就比你玩夠三粒鐘，真係皇恩浩蕩。

第三條就更加痴線，將規管課金量。新法規下網絡遊戲公司不能為未滿 8 歲用戶提供遊戲付費服務，而未滿 16 歲人士單次課金額不得超過 50蚊人仔，每月課金金額總值不能超過 200蚊人仔。而 16 歲以上未滿 18 歲青少年每月課金額總值不能超過 400 蚊人仔，而且當局特別指明會有人用父母手機或微信帳戶註冊遊戲帳號規避限制，已要求遊戲公司嚴格執行實名註冊，用戶必需要有效身份證明先可以註冊遊戲帳號。

今次《關於防止未成年人沉迷網路遊戲的通知》一定會非常影響中國遊戲營收，係呢個政策下將市場重心放於海外先係明智之舉，例如《碧藍航線》營運方式就非常之有參考價值，對玩家黎講未嘗唔係好事。但係相關法例足見中國對市民嘅監控越趨痴線，加上大家都明顯感受到中國對香港嘅干預越黎越無法理根據，有無視《基本法》跡象，相關法例延伸之香港亦不足為奇，想每日瘋狂打機的話就要認真正視中港問題，並勇敢企出黎說不。