引發全球炎上嘅共雪，就算日前喺 Blizzcon 度扮中立講「唔好意思囉」，一眾玩家仍然不接受，連帶影響母公司近期大作《Call of Duty: Modern Warfare》被拖累。不過早就有傳本作劇情非一般地爆，而且我地試玩時仲發現中文翻譯團隊疑似暗撐香港，出現勁多「巧合」，直頭係一路玩一路「嘩」！
講故事模式之前，例牌都要講下畫面流暢度呢類野。今集《Call of Duty: Modern Warfare》最高支援 4K@60Fps 畫質，而我地使用 PS4 Pro 整個遊玩過程於大約維持於 52-57Fps，頗為穩定。另外遊戲中不論人物、武器模組、背景、場景等等表現完美，音效更非常有臨場感，絕對不負大作之名。
遊戲畫面真係有 3A 大作水平
暗中潛入場景做得非常有心思，可擊破燈泡製造有利環境，戴上夜視鏡後會顯示光度讀數，方便時刻確保自身處於黑暗之中
唔係淨得槍戰，圖中呢段玩緊教職員點樣避開恐怖份子離開，幾好玩
仲有捉迷藏玩，不過比人捉到就 GG……
《MW》每集嘅故事都係重點，仲成日影射國際政治事件，加上今集可算係 Reboot 整個系列首炮之作，自然不容有失。今集故事描述虛構嘅中東國家「烏茲斯坦」爆發為時長達數十年嘅內戰，而國內嘅極端恐怖份子（塔利班啲FD）同當地反抗軍持續對峙，但因為該國恐怖份子一次行動，令到美國及俄國介入呢場中東內戰。
成班失控痴線佬
事實上，《Call of Duty: Modern Warfare》敘事總監 Taylor Kurosaki 接受外媒 GameSpot 採訪時，就有提到故事嘅靈感係黎自於現實世界嘅事件。而今次嘅劇情相信有部份取材自 90 年代波斯灣戰爭及敘利亞內戰，而且「死亡公路」章節更明顯地影射波斯灣戰爭「死亡高速公路」轟炸事件。（當年伊拉克軍隊退出科威特，喺往伊拉克嘅高速公路上受到以美國為首嘅多國部隊空中轟炸，導致極多平民因此喪生，由於轟炸長達十多小時，被認為係屠殺多於戰爭）
「死亡公路」章節更明顯地影射波斯灣戰爭「死亡高速公路」轟炸事件
雖然處於戰爭，但遊戲強調我地並唔會濫殺無辜，就算我想開槍殺人質都唔比
死亡時會有各種名人金句，好警世
雖然劇本係咁寫，但係遊戲中各種劇情，再加上中文翻譯，身為香港人玩時真係相當有感覺。遊戲其中一個情節需要玩家潛入「烏茲斯坦」，以平民身份穿梭於城鎮中盡見維持治安部隊一切醜惡面貌。佢哋會無視民眾一切基本權利，隨意於民居地方施放化學氣體（香港用緊嘅係化學武器，詳見）、隨意侮辱、殺害市民、無論發生咩事自己一定唔會錯、鼓勵民眾互相督灰，做法係咪同某個紀律部隊好似。以下分享遊戲精彩截圖。
身為軍人有手榴彈唔用，叫你用火魔法已經好騎呢……（仲要好早有得用）
敵人首領，以為自己就係法律同秩序，但實際上係極之殘忍嘅狂人，係咪同香港警察好似？
港產知名大殺傷力武器：鐳射槍
於民居市中心放化學氣體，你死你嘅事。係咪好熟口面？
非常有感覺嘅一幕，為咗換黎美好嘅未來，即使滿手鮮血亦必需有人去做，所以前線義士係好需要大家支持。
一般遊戲好少會用「光復」二字，極之懷疑中譯組有留意香港事件，暗撐港人
一臉正經地講出呢三個字，相信除咗 Captain Price 之外無乜人做到
總結：
今集《Call of Duty: Modern Warfare》單人模式各方面都非常出色，係嫌劇情太短，不過香港人玩真係非常有感覺，特別係玩玩下見到「光復」二字。可惜嘅現時大環境下被共雪事件拖累作品聲勢，否則今集有可能成為整個系列最暢銷一作。
而今集多人模式其實都幾多野玩，不過我只係玩過十零場，所以唔講太多。都係會有得升 LV，之後解槍解技能咁，但 6 vs 6 節奏夠快打得過癮，亦有大戰場 20 vs 20，算係滿足晒唔同玩家（雖然今集新增架槍動作令遊戲更鼓勵 Camp 位）。我地都明白共雪事件令人憤慨，但中譯組堆對白又真係好似暗撐香港，我都唔識講支唔支持隻 Game 好，只可以話如果真係想玩的話不妨等下二手，或者幾個 FD Share 隻碟啦。
同樣加映夜襲特戰版夜視鏡相集
盒野 Size 同嘉頓雜餅差唔多，都幾大盒
盒背有列埋 DLC 有乜
夜視鏡同金屬收藏光碟盒
附送埋支架，架上寫上 MW 字眼
副鏡的確係幾靚仔，而且堅係用得，會因應光度自動切換至夜視 Mode，另外有黑白 Mode 同遠距離紅外線
雙眼視距、焦點、與頭部距離全部有得調教，係幾正
VJGamer總編，細細個已經蒲機舖，機齡甚深，熱愛電玩文化。