生活喺大城市，每日返工放工日日做住差唔多嘅野，呢個應該係唔少人嘅生活寫照。曾製作《Among the Sleep》嘅開發商 Krillbite Studio 黎緊就會有隻新作《Mosaic》描寫呢個情況。每日過住單調、重複嘅生活，可能只係一個小決定就會做成改變。
《Mosaic》（馬賽克）描述生活喺大城市中嘅主角，佢只係一般打工仔，每日都係重複住返工放工，一成不變既單調又孤獨嘅生活。某日當主角如常返工時遇到奇怪嘅事情，由呢刻周圍開始發生改變。
本作遊玩方式獨特，並無提示你應該要做乜。例如遊戲開始時主角如常返工，準備跟隨人潮去車站時，如果選擇向反方向行就會有意想不到嘅發展，可能係會發現一個有陽光照寫嘅祕密空間、救被困於樹上嘅貓貓等等，當主角不斷去做同大眾相反舉動時，富有象徵意義嘅遠方高樓大廈亦都會慢慢崩塌。
有趣嘅係當大廈崩到咁上下時，就會突然恢復原狀，好似夢醒一樣，好迷幻。似乎係意味住就算想發夢，最終都係要面對現實老老實實返工，遊戲就一直處於虛幻同現實之間發展。雖然本作題材頗為灰暗，但係開發團隊有強調會為玩家帶黎豐富嘅遊戲體驗，並且會有各種解謎要素。另外預告片入面果隻超無聊手機遊戲《Mosaic: BlipBlop》現時於 Google Play 同 App Store 都有得下載。
隻 Game 堅無聊，好想知點玩到佢咁開心的……
《Mosaic》預計於今年 12 月 5 日發售，對應平台為 PS4 / Xbox One / Nintendo Switch / PC Steam，並會對應繁體中文。
VJGamer總編，細細個已經蒲機舖，機齡甚深，熱愛電玩文化。