《伊蘇 IX -黑夜怪人-（イース IX  -Monstrum NOX-）》於 9 月 26 日已經推出日文版本（於 2020 年 2 月 6 日推出繁體中文版），我作為 Falcom 作品多年玩家，當然係事不宜遲地攻略遊戲，用左大約 40 小時爆機。

不過，或者真係愛之深，恨之切，《伊蘇 9》嘅感想文，我遲遲不懂如何落筆。或者係因為《伊蘇 8》做得太成功，所以抱住同樣期望去玩《伊蘇 9》時，難免感到失望。

故事黎講，《伊蘇 9》繼續係講述 Adol 眾多旅程中嘅其中一個。不過，《伊蘇》遊戲故事大多獨立成章，對於故事好早期帶出嘅眾多傳說伏線，我諗，官方自己或者都唔打算去埋尾了。雖然今集有「翼人」出現，舞台亦設置喺故事起源地嘅附近，不過嚴格黎講，實在稱唔上係回應緊當初設定嘅伏線。

有玩過《伊蘇 8》嘅朋友，應該都會認同 Adol 於荒島上與女神 Dana 記憶重疊嘅「靈魂出竅」部份做得非常出色，出色係因為劇本安排有序；但係，唔知係唔係因為呢個設定大獲好評，《伊蘇 9》又想照板煮碗，續玩「靈魂出竅」橋段，但係情節安排上就牽強得多。

今集主題，簡單黎講，係「複製人」，期望將當年強大嘅幾位傳說武士嘅靈魂，用「鍊金術」重塑成為新嘅生命。就咁聽其實係幾有趣的。不過，個人認為《伊蘇 9》於劇情節奏上做得慢而刻板，主角一行人六個角色，各自用一個章節去「解放」以及令佢地加入 Adol 嘅隊伍，然後最後幾章就突然加速，一口氣將所有所謂「真相」塞哂比玩家。

我唔知呢個係唔係一個好嘅設定，因為於《伊蘇 8》中，所有角色嘅加入都好自然，隨住你開拓更多土地，就有機會遇上流落唔同地方嘅 NPC 或可操作角色，呢種模擬 Semi Open World 嘅自由探索感，係《伊蘇 8》最吸引人嘅地方。

黎到《伊蘇 9》，主要場景為城鎮入面，而城鎮整體感覺，同《閃軌》頗為相似。玩家喺一定區域推左劇情，就會有一場固定戰爭要打，打完就開新場景，慶幸各場景有唔同收集元素，所以探索黎講都算係有趣的。

Falcom 社長近藤先生曾經表示，《伊蘇 9》係公司一心想要革新嘅作品，玩完 TGS 試玩版我都無咩感覺，到玩正式版，我終於明白佢地想將遊戲變得更多元化、更活動性嘅野心。不過，遺憾嘅係，開發技術追唔上野心，都係一個事實。

作為一隻單機、唔需要網路服務、畫質又唔算特別靚嘅 RPG 遊戲，《伊蘇 9》Drop Frame 及 Lag 機問題頗為嚴重。由於戰鬥時會出現大量敵人以及我方 NPC 一齊快速行動，所以，基本上，畫面上面人一多，遊戲就開始 Lag 了。時值 2019 年了，單機遊戲仲會出現呢種程度嘅 Drop Frame 問題，我係覺得失望的。

人一多就 lag…

至於遊戲今集獨有嘅「異能」系統，例如可以短程飛翔、透視、隱物、牆上行走等等功能，係有趣的，亦可以話係遊戲裡面最可取嘅設計。

不過，視點問題都係令人氣餒，例如係好窄嘅走廊遇上巨型敵人，好多時根本角色就卡死於牆裡面，變相被敵人屈機。

亦有一種狀況係，於懸崖邊遇敵。今集一旦觸發戰鬥，就必須要將敵人打完，先會回復到正常模式。但係，因為地型問題，有時啲怪會去左一啲你根本打佢唔到嘅位置，真係令人好無語……。

呢個位卡左我好耐，我跳落去自殺又打佢唔到，結果要 chok 位等隊友 NPC 唔知點解彈出彈入幫我打死隻雜碎小怪 orz

Falcom 出品就一向唔係主打畫面靚，不過遊戲裡面嘅場景貼圖同埋各種材質，以 2019 年水準黎講，又真係略為粗糙了一點。自從《空之軌跡》開始，我就成為了 Falcom 作品嘅 Fans，不過隨住遊戲開始轉型全 3D，《軌跡》系列劇本還好，但係撇除 Fans 大愛包容嘅私心的話，由《閃 3》開始，去到而家嘅《伊蘇 9》，一路走來，整體系統上面嘅進步著實唔算多。

我明白開發團隊想要追上時代努力製作活動性更強、3D 立體嘅所謂「現代感遊戲」，不過如果開發資源有限，依然要維持接近一年出一隻新遊戲嘅傳統，係咪真係一件好事呢？

同埋 Falcom 作品本身仲有一樣賣點，就係音樂。Falcom Sound Team JDK 相信有留意開遊戲 OST 嘅朋友，都會見過佢地嘅大名，無論係《空軌》嘅「星の在り処」、《空軌 3》嘅「Cry for me, cry for you」，儘管遊戲完結，優美旋律依然長留玩家心中。又或者講近期啲，《伊蘇 8》嘅「Lacrimosa Of Dana」，時至今日都長存我 iTunes Playlist 裡面，幾時聽，都仲係咁震撼。

至於《伊蘇 9》……我唔可以話啲音樂唔好聽，但係，可能因為有異世界設定，所以音感上太強調「另類」「熱血」以及「電子音」，今集整體音樂真係無話邊一首令我特別難忘。仲有，戰鬥時嘅背景音樂，係大量電子合成嘅結他聲，再加埋六個角色一齊出招嘅攻擊音效，啲聲經常撞埋一齊，真係好難稱得上係享受。

戰鬥音樂示範如下：

Falcom 筆下故事一向吸引，例如《軌跡》系列世界觀宏大而美麗，我當然仍然會期待佢地下一隻作品，但係除左劇本，系統嘅提升、或者如何可以提供更細緻嘅畫面質素，相信都係玩家期待開發團隊可以進步嘅空間。畢竟 PS5 都黎緊，遊戲呈現嘅仲係接近 PS3 遊戲質素畫面，我地呢啲死忠 Fans 就話咩都玩啫，但係要吸引新玩家，也未免太有挑戰性了吧。

P.S. 雖然成篇文有唔少彈嘅地方，不過都係衝左白金……證明我真係 Fans orz

我明白團隊嘅努力同埋野心，希望下一隻作品可以見到不一樣的進步吧！Falcom 社作品一直陪伴我成長，佢地出色嘅劇本始終係我最心醉嘅地方，如果技術層面都能繼續進步，相信作品亦會更加吸引。

提多次：繁體中文版本已於 2020 年 2 月 6 日上市，鍾意玩日系 RPG 嘅朋友可以考慮入手！

【PS Store HK 線上購買連結】