前《刺客教條》（Assassin’s Creed）系列製作人 Patrice Désilets 歷時五年最新作品《祖先：人類奧德賽》（Ancestors : The Humankind Odyssey）好快就會喺家用機玩到，呢隻遊戲由於製作人嘅威名，甫公布就引起各方關注，大家準備好由刺客「進化」成猿人未？

《祖先：人類奧德賽》（Ancestors : The Humankind Odyssey）屬單機冒險動作遊戲，採用第三身視點。遊戲中玩家將回到一千萬年前至兩百萬年前間，扮演人類嘅祖先，喺廣大嘅叢林之中為展開最強嘅冒險：人類演化歷程。本作將會有三大主軸，分別係 EXPLORE（探索）、EXPAND（擴張）、EVOLVE（進化）。

由於要喺叢林中生存，所以必需探索大地中未知嘅部份，並留意掠食者及其他危險，已知嘅掠食者有巨蟒、劍齒虎、鱷魚等野獸。當然經過分析、戰鬥後會陸續獲得各種能力，進而強化自己嘅存活機率。另外同現實生活一樣，要兼顧進食、飲水同睡眠，先有能力存活。

擴張唔單只係領土，仲講緊要壯大整個家族，因為必需有數量上嘅優勢先可以提高生存機率。要擴大家族可以吸收其他同種族成員並繁衍後代，而每次抉擇都會影響家族歷史，影響演化過程。

演化過程會因應上代強化能力而產生差異，會有強化體能，亦會有強化智力及溝通能力，當然除生理因素之外，知識亦都可以傳比後代。經過時間嘅推進，玩家將會見到自己嘅氏族到底會係日漸強大定係會走向滅亡之路，又由於每個玩家嘅選擇都有所不同，所以每次嘅旅程都會係獨一無二。

《祖先：人類奧德賽》（Ancestors : The Humankind Odyssey）PC 版本已經於 8 月 28 日，於 Epic Game Store 上市，一年後就會有埋 Steam 版。而  PS4 / Xbox One 版本則預定 2019 年 12 月 6 日上市。