最近有一隻遊戲推出之後外國媒體一致給予極高評價，但係中文媒體就接近無人提，講緊嘅就係《Disco Elysium》。呢隻遊戲自 10 月 16 日正式發售後，一直都高踞銷量榜前列，並且得到極度好評評價，識貨嘅你又點可以錯過呢隻 Game！

外媒一致高評價

《Disco Elysium》係一隻開放世界 RPG 遊戲，玩家扮演一位刑警係，喺犯罪橫行嘅小鎮「Revachol」當中調查，想成為正義嘅朋友又或者黑警都無問題。遊戲結合偵探小說同傳統 RPG 優點，無論係美術風格、台詞、劇情甚至係戰鬥系統等等都非常獨特。

我地玩一般含成長要素嘅遊戲好多時都會有個諗法，就係「越後期角色能力值越勁越無敵」，但喺《Disco Elysium》入面就無呢支歌仔唱。當創建角色時，需要分配人物四個屬性，呢四個屬性將決定可習得技能等學習能力，能力範圍外就係你角色嘅限制，當然亦有可能用出乎意料嘅方法去克服弱點。咁你可能會話「升爆一個屬性咪得囉」，如果閣下咁做就會感受到乜野叫做「物極必反」。

《Disco Elysium》內人物四個屬性智力、心智、體格、協調，當你集中谷爆一個屬性時可能會有反效果。例如低智力會令角色變得膚淺、愚昧、迷信，但當智力過高時就會令角色過於自信、恃才傲物，容易受他人吹捧而迷失自我。體格低意味角色生存力不足，但過強體格會令角色變得嗜血、含暴力傾向、小小事就會令你失去理智。所以並非一味谷爆單一屬性就會強大，應該平衡發展，如果唔係就會好似香港警察咁又情緒化又嗜血又唔做野又唔讀書。

另外遊戲入面有個新穎嘅系統「Thought Cabinet」，入面可以收藏大量嘅「思考內容」（簡單講就係一件事有多種睇法），透過各種內容排列將會對案件有更多唔同嘅睇法，而呢類思考內容有時會受到 NPC 對話嘅影響，就好似現實中同人傾計有機會改變自己諗法一樣。另外遊戲中與 NPC 嘅對話好視乎角色本身屬性同技能，基本上係有 N 個劇本對答，每次都係一個新體驗。

有相關技能的話會多咗對話，會見到主角同自己腦內對話

選項會有成功率顯示，要因應風險去決定下一步行動

除咗細節設定出色，戰鬥系統都無 hea 到。玩家可以喺 24 種技能當中，揀啱自己風格嘅技能組合去配搭，加上 14 種武器 80 種服裝，要試都有排試。《Disco Elysium》已經推出，暫時只有 PC 平台，只有英文一種語言，不過有消息話明年三月會對應埋中文，到時一定要試，建議擺定落 wishlist先。