下年台灣將會進行總統大選，各陣營嘅選舉工程亦都正式展開。而追求連任嘅現任台灣總統蔡英文團隊日前就突破台灣競選史框框，以遊戲作為官方競選宣傳途徑，而且事前宣傳影片製作認真，以遊戲玩家角度去睇都似乎值得一玩！

本作取名《總統府大冒險》，屬 AVG文字冒險遊戲，雖然宣傳影片中未見遊戲具體內容，但係當中穿插住各種蔡英文過去嘅執政關鍵字，估計玩家會以蔡英文身份體驗一連串嘅政治決策過程。另外影片中見到蔡英文化成短髮眼鏡少女（行政院長蘇貞昌都有份），加上最尾嘅標題「什麼 台灣高中三年二班 的我 竟然掉入了 異世界 而且還遇見了 總統！？」，睇個款應該會加入異世界劇情。

遊戲未知幾時先會推出，官方就快即將登場，估計等多陣就有得玩，對應平台多數都係 PC 同手機平台。比較感觸嘅係當對岸用 ACG + 遊戲形式去拉近同年青人嘅距離時，我哋香港政府就用盡一切方法去抹殺年青人，真係何其唏噓。