KOEI 旗下 Gust 工作室最新力作《萊莎的鍊金工房～常闇女王與秘密藏身處～》已於 2019 年 9 月 26 日推出，對應 PS4、Switch 以及 PC（Steam 版於 10 月 29 日推出）。

《鍊金工房》作品出得好密，因為工作關係，每集都會有一定程度涉獵了解（當然《鍊金》每集都係獨立成章的，無玩過前作都唔怕跟唔上故事），今次呢隻《萊莎的鍊金工房》，除左見到 Gust 工作室嘅技術更進一步之外，亦處處見到團隊對於打造「美少女遊戲」嘅用心。

《萊莎》故事好簡單，生活於鄉村嘅萊莎，與兩位親友蘭托及塔奧，原本過住平穩而單調嘅鄉下生活；某天遇到來自大城市嘅千金小姐科洛蒂婭，以及鍊金術士及戰士安佩爾及莉拉，內心充滿好奇與憧憬嘅萊莎一行人，開始喺呢班「外來人士」身上學習，隨住萊莎學識嘅野越多、對安佩爾一行人了解越多，故事亦慢慢牽涉到主角所在城鎮嘅安危。

簡單黎講，個故事非常直線，無咩大陰謀，世界很和平，大家很和善，係一個好美麗嘅世界。由於故事發生喺夏天，《萊莎》呢個遊戲，真係可以形容為主角萊莎嘅一場仲夏夜之夢，因為故事結局一啲都唔拖拉，事情做完了就曲終人散，各奔前程，萊莎繼續留喺鄉村尋找自己方向，所以本文題目我先會話係「純真少女成長物語」。

不過日本方面玩家把口就幽默啲，佢地話《萊莎》完全反映日本現況：萊莎生活喺日本二線城市，有一日遇到東京黎嘅都市人，所以佢就心生好奇同埋仰慕，然後自己都想出去闖。係一隻好典型嘅日本年輕人上京物語（笑）

另一個遊戲注目點（或者係網上最多玩家談談嘅部份）應該就係人設。大家都一致認為：女主角萊莎嘅身材非常好。要肉有肉，要線條有線條，跑步時要震動有震動，叫其他村民自慚形愧之餘，亦叫我望塵莫及（喂）

認真講句，人設係靚嘅，場景以及畫面呈現亦都做得非常唯美清新；至於女主角身材好，相信係 Gust 呢個美少女遊戲工作室嘅定番創作理念，玩家們覺得有享到福利就好。

來個大小對比圖（喂）

以一個休閒系 RPG 黎講《萊莎的鍊金工房》其實非常抵玩。鍊金部分係遊戲嘅重點之一，如果要完美解鎖哂佢嘅鍊金系統，都真係要花啲時間，因為素材質素會影響成品嘅級數。可以自己不斷試唔同素材效果，係有趣嘅。

中文版畫面

日文版畫面

至於戰鬥方面，遊戲沿用傳統 ATB 制式選項戰鬥模式，不過如果聽從同伴建議出招或提供協助，會有效果及獎勵加成。都係一啲非常簡單易上手嘅戰鬥操作。

中文版畫面

日文版畫面

畢竟係 KOEI 出品，整體遊戲當然是維持水準，中文版翻譯以及字體植入亦做得貼近原文又不失神髓，如果你係想玩中文版嘅可以放心入手。

《萊莎的鍊金工房》係一隻隨時隨地拎上手玩都賞心悅目嘅 RPG 作品，作為 Gust 工作室嘅小小粉絲，這個遊戲我就不客氣服用了；如果你想玩一隻輕鬆嘅 RPG 遊戲，呢隻《萊莎的鍊金工房》相信會適合你。