今年 B 字頭廠商真係寧舍多新聞，繼共雪一系列事件惹全球玩家抵制後，另一間 B 字頭廠商 Bethesda 因為日前公佈嘅《Fallout 76》新政策辣慶一眾玩家。本身已經問題多多嘅《Fallout 76》自推出後就負皮不斷，超多 Bug 又無 NPC 等等問題一直纏繞，雖然仲有一班死忠支持，但係新公佈嘅政策似乎想趕走埋呢班死忠玩家。

Bethesda 日前宣佈推出全新收費制高級會員「FALLOUT 1st」，雖然擁有大量非必要獎勵，但當中包含一個非常而且必需嘅功能「Private Worlds」（私人世界）。簡單講呢個功能容許玩家開一間私人房，最大支援八人共同遊玩。由於《Fallout 76》係一隻 Online Game 加上容許 PVP，同時有啲 MOD 及為數不少嘅任務都要多人先解到，所以私房都頗為必需。但係新政策下玩家必需擁有「FALLOUT 1st」先開到，但係呢個會員每個月要比成 USD $12.99（成百蚊港紙），一年就收你平啲 USD $99.99（八舊水），仲貴過一年 PSN Plus + Xbox 金會員年費，完美地表演緊咩叫吸血！

如果服務值得的話，就算月費價格高昂死忠都會說服自己買，但係就有玩家揭發所謂嘅「Private Worlds」根本就搵笨的。有玩家發現進入「Private Worlds」後並非全新嘅世界，而係其他玩家曾經用過嘅地圖，世界內 NPC、衣櫃、箱子等等全部都無重置，只不過係「理論上」其他玩家無法進入咁解。不過要留意呢個所謂嘅私人世界只要係朋友清單上見到人玩緊「Private Worlds」就可以直接加入，無需得到房主同意，而房主亦都無法隱藏房間，根本就係智障級設定。

唔知 Bethesda 係咪趁住年底發力，期望追上「共雪」成為最多玩家 Google 廠商，其實搞咁多無謂野不如整返好隻 Game 先啦好嘛？