相信鍾意玩恐怖遊戲嘅朋友，一定有聽過《零》系列嘅大名，我首次玩嘅係 PS2 年代嘅《零～紅蝶～》（之後先玩返第一集），當年放暑假開住冷氣半夜玩，真係說不出嘅風味（以前暑假係可以打機架，陰公！）。

不過，《零》自從 2014 年出喺 Wii U 上面隻《零 〜濡鴉ノ巫女〜》之後，就一直再無消息，中國就成日有抄襲作品出現，但係官方就既無重製、亦無 Reboot，令我同一班 Fans 真係覺得好可惜。

然而，遊戲嘅新發展總算有啲眉目，因為《零》系列製作人菊池啟介先生接受外媒 Nintendo Everything 專訪時表示，雖然自己目前忙於開發《Fairy Tail》RPG 嘅工作，不過佢亦好明確咁表示，佢認為 Switch 平台既可以移動，又可以家用，自己想為呢個平台做一隻新嘅《零》作品！

《零》系列始於 2001 年《零～zero～》於 PS2 平台上推出，以日本大量民族學、傳統、迷信以及都市傳說為創作背景，故事恐怖得黎，劇本亦都於人性上面有深刻嘅描寫，係日系恐怖遊戲入面嘅傑出佳作。遊戲一共有五隻原創作品，一隻重製，一隻外傳，對於鍾意玩恐怖遊戲嘅朋友黎講，地位超然。

玩家手上嘅武器，係一部相機（射影機），於探索過程中，玩家要收集唔同菲林、藥品去戰鬥以及生存，亦需要喺蛛絲馬跡裡面搵出事情嘅「真相」。《零》系列吸引人嘅地方，係佢嘅結局永遠唔止一個，但係我相信無一個結局係令你覺得「完美大團圓」，而融合大量日本本土傳說嘅場景以及敵人，都係既恐怖又美麗得令人心折。

到底新作會幾時有消息，而舊作會唔會重製或 HD 化落 Switch？就讓我們期待下去。

最後送上《零 ～濡鴉ノ巫女～》一個 MAD，假如你認識呢個系列，希望睇完你會感到興趣：