臨近萬聖節特別多恐怖 Game 出，想玩復古味就可以試下今次介紹嘅《Close to the Sun》（登陸太陽）。遊戲背景係架空十九世紀，主角為咗搵返失蹤嘅妹妹而黎到聞名於世嘅科學家「尼古拉．特斯拉」（Nikola Tesla）製作嘅科學實驗船上，展開一連串恐怖驚悚冒險。

《Close to the Sun》由曾製作脫出生存恐怖遊戲《ENKI》、以及魔法世界《N.E.R.O.》等作品嘅獨立遊戲開發商 Storm in a Teacup 製作，採用第一身視點。遊戲以「瘋狂科學家」尼古拉．特斯拉為咗逃避佢嘅最大競爭對手愛迪生，而造咗隻叫「Helios」嘅巨型船隻，並喺船上進行一連串嘅實驗，然後主角就為咗搵返個妹就走咗上隻船度。

遊戲中嘅氛圍、復古科幻背景都有好濃嘅《生化奇兵》味道，而外媒 Gamesradar 同 Kotaku 都同樣認同，後者更講過本作係「無戰鬥版嘅《生化奇兵》」。另外製作人之前亦都講過本作並唔會刻意去偏重恐怖感，但依然會令你疑神疑鬼、提心吊膽，務求增加玩家投入感，同埋用心解謎。

《Close to the Sun》Epic Games Store PC 版限時獨佔已經上市，而 PS4 / Xbox One / Nintendo Switch 版本將於 2019 年 10 月 29 日上市。