可以話係魂系遊戲嘅起點，由 FromSoftware 開發嘅超高難度遊戲《Demon’s Souls》終於重生！不過今次就並非官方消息，係由知名爆料人 Tidux 發放嘅消息，但考慮到之前已經有唔少關於本作重製嘅消息，再加上今年年頭外媒 Kotaku 亦都有爆過本作重製版正在開發中，似乎今次係真了！

《Demon’s Souls》於 2009 年時推出，係第一款由宮崎英高主導開發嘅魂系列遊戲，稱之為魂系遊戲起點絕不為過。根據 Tidux 係 Twitter 發佈嘅消息，《Demon’s Souls Remastered》將會以 PS5 首發遊戲登場，而重製嘅工作就由 Bluepoint Games 負責。（曾負責《汪達與巨像 重製版》、《Gravity Rush 重製版》）

《汪達與巨像 重製版》

當然玩家最關心嘅係好似之前《Dark Souls: Remastered》咁純粹提高畫質，定係好似《汪達與巨像 重製版》咁完整重製，呢點係 Twitter 上已經有網友提問。而 Tidux 亦都回覆話會係好似《汪達與巨像 重製版》咁得到完整嘅重製。

當然就算 Tidux 講到幾似都好，都係以官方消息為準。但係留意返 Sony 公佈 PS5 時，外媒 Wired 就曾經係專訪中提到 Bluepoint Games 幫緊 PS5 整緊一隻「大作」，再睇返佢地嘅往績多數都係幫人做重製工作，就咁睇《Demon’s Souls Remastered》可能性的確唔低，反正 2020 年尾就推出，如果爆料屬實相信好快會有官方消息。