暴雪熱愛人民幣所以打壓聰哥事件繼續發酵，除左國內外網友玩家繼續杯葛之外，正如我地早前報導所講，暴雪內部員工對公司呢個決定亦都深感不滿。佢地唔單止上 Reddit 甚至接受外國傳媒訪問表達不滿，同事更加開始於公司內開始號召「支持香港，反抗霸權」嘅行動。

如果你以為圖中朋友拎住遮同埋部份人著黑衫，就係我地自我打飛機話佢地撐香港嘅，No No No，事實是咁的。

對於外國朋友黎講，「黑衫」以及「雨傘」已經成為國際對於香港抗霸權運動嘅認知標記（a visual symbol adopted by protesters in Hong Kong）；而外媒 The Daily Beast 前去訪問有參與暴雪抗議嘅員工，佢地都表示清楚明白雨傘嘅意義，亦向媒體說明，佢地而家嘅行動，係「想話比香港嘅抗爭者知我地係支持你的（expressed support for pro-democracy protesters in Hong Kong）」。

暴雪公司門外其中一樣「核心價值」：Every Voice Matters. Seriously?

中國騰訊持有暴雪 4.9% 股份，而暴雪淨係 2018 年最後季度於大中華地區賺到嘅錢，佔該季度總收入嘅 12%，當中大部份黎自電競比賽及活動。暴雪員工話會繼續號召進一步行動，直至高層願意出黎回應；不過直至本文刊出時，外媒 PC Gamer、CNET、以及 The Daily Beast 全部都未有收到暴雪對於公司內部示威嘅回應。

政治與我們息息相關，NBA，暴雪，仲有更多唔同品牌不能盡錄，香港嘅示威，引發起最強烈嘅蝴蝶效應，就係唔少外國企業不得不正視 RMB 以及公司行政自主權嘅利害關係。到底暴雪事件仲會發酵到邊個地步？就等我地繼續觀察。