即將於今年 10 月 31 日推出日文版本嘅《Persona 5 The Royal（P5R）》又有新消息公開！作為全球賣出超過 270 萬套嘅大熱遊戲《Persona 5》嘅正統續作，相信唔少 Fans 都同我一樣，呢排喺可以做自己野嘅時間努力清緊積落黎嘅遊戲，準備全心全靈迎接 Joker 回歸吧？（笑）

官方公告平台「モルガナ通信」於 10 月 3 日再度為大家帶黎新資訊，玩家除左喺遊戲入面可以進行正傳故事之外，亦會有一個類似其他遊戲「Gallery」嘅地方，不過就唔係比玩家淨係睇返遊戲中動畫咁簡單，而係化身成為「My Palace（マイパレス）」嘅個人化空間。

玩家於遊戲入面進行支線或者推劇情都會有機會得到「P 幣」，呢啲「P 幣」就可以於「My Palace」裡面解鎖唔同嘅物事；而玩家可以喺「My Palace」裡面按喜好佈置，例如你可以將自己嘅 Persona 雕像擺喺入面做擺設，可以睇到《Persona》系列海報，其他遊戲中角色亦會黎到你嘅「Palace」同你進行互動。

互動除左閒話家常，仲可以同佢地一齊玩啤牌遊戲「大富豪」！

遊戲中仲有一個「Challange Mode」，如果你係《Persona》Fans 就要注意，因為《P3》《P4》嘅主角將會以 DLC 形式加盟遊戲，而佢地亦可以出戰「Challange Mode」裡面嘅戰鬥添！另外一樣聯乘就係，角色可以替換外觀，外觀就係 ALTUS 同社其他作品嘅角色服裝，連《Persona Q2》迷你版都有。

日文版《P5R》將於 2019 年 10 月 31 日發售。