就黎又到萬聖節，作為 Game 迷就梗係要搵隻恐怖 Game 玩啦，未有心水嘅不妨試下今次介紹呢隻《恐懼之歌》（Song of Horror）。咁耐以黎大家玩開嘅恐怖 Game 都係用設定好嘅劇本，最多都係 Random 係咩位有鬼出黎嚇你，但呢隻遊戲就會因應玩家行為而作出相應改變，務求令玩家防不勝防！

《恐懼之歌》（Song of Horror）由 Protocol Games 開發，屬恐怖冒險遊戲，採用第三身視點。作為恐怖遊戲，最重要嘅元素有二個，第一個就係故事。遊戲會有一個龐大嘅劇本，分為五章並透過總數十三位角色去體驗。不過每個章節以及每位角色並非獨立一個故事，而係透過唔同嘅地點、角色等去體驗同一個故事。

當玩家扮演不同角色時，就會由相應嘅視角去對場景進行探索調查，亦即係玩家將會睇到唔同嘅提示，同時會因應玩家所採取嘅行為故事會有相應嘅改變，最嚴重會導致角色死亡！而當角色一旦死亡係無得復活的，未完成嘅探索 / 調查將會經由第二位角色繼承，就類似《Detroit》咁。

《恐懼之歌》（Song of Horror）將會先推出前兩章遊戲，喺第一章故事講述一位知名作家 Sebastian P. Husher 成家人突然失蹤，於事負責佢作品嘅編輯就派出助手去搵佢，然後從此就無再見過呢位助手了……。

恐怖遊戲另一重要嘅元素就係氣氛，製作團隊表明遊戲中嘅敵人由 AI 控制，會因應玩家嘅行動及決策去學習並作出改變，務求以意想不到嘅方式去獵殺玩家。呢種方式可以為每位玩家提供獨特嘅遊戲體驗，亦都因為敵人嘅行動係難以預料，帶黎嘅緊將感同恐怖氣氛將異常強烈。

《恐懼之歌》（Song of Horror）預計於 2019 年 10 月 31 日萬聖節當日上架，暫時只有 PC Steam 平台。

23.04.2021 更新：遊戲日本代理將於 2021 年 8 月 26 日將遊戲於 PS4｜Xbox One 平台上面推出，同時對應 DMM PC（相關報導）。