講到策劃搶劫案遊戲首推梗係《Payday》系列，遊戲入面有教大家進行劫案之前應該要有周詳嘅計劃，先去視察場地諗點入手，同埋要制定得手後嘅逃走路線。不過想自創進入同逃走路線，就並未做得到。今次介紹呢隻遊戲《Teardown》就係主打完全自由度，可以用盡所有方法去「設計」劫案！

《Teardown》主題非常簡單，就係要諗計點入目標建築物偷野再撤退。但呢隻遊戲嘅特色係整個場景物品都可以破壞去進行互動，並且可以利用各種物品去進行搭建工程。例如玩家可以拆除水管支架，再用該支架搭建一條直上建築物二樓嘅捷徑。遊戲中有多種工具、車輛等供你使用，總之就係可以利用所有嘅物件去進行罪案，完美咁比大家發揮創意！

而當玩家落手拎起第一個目標物時，警報將會響起，玩家要喺警狗黎之前按早就計劃好嘅路線去逃走。當然進行呢個過程中係會出現各種意外，例如跳錯位、跑得慢卡住等等，所以喺成功之前要不停修正路線去完成完美嘅犯罪！

《Teardown》尚處於開發階段，預計 2020 年推出，對應平台為 PC Steam。