潛入 Game 大家都應該唔會陌生，但係如果叫你扮隻「鵝」去潛入你又試過未？早前就推出咗一隻頗另類嘅潛行解謎遊戲《Untitled Goose Game》，玩家將扮演一隻「鵝」去潛入人類社區，並作出種種「破壞社會安寧」行為，名乎其實嘅搞屎棍！

潛「鵝」諜影！

《Untitled Goose Game》（賤鵝）由澳洲獨立團隊 House House 製作，遊戲屬潛行解謎小遊戲。呢隻遊戲並非大家玩慣果種潛入殺敵遊戲，玩家潛入嘅目的只有一個，就係對社區中嘅人類作出種種惡作劇。例如係偷偷地潛入花園偷園丁條鑰匙、整濕人地件衫、去人地信箱度偷信掉落河等等，玩落係幾搞笑。

呢個細路好好玩，可以除佢鞋帶再偷佢野，引佢仆街之後再擔走佢副眼鏡，賤到爆

本作最引人入勝嘅地方在於遊戲中各種細微設定，例如遊戲中接近所有物件都可以作出互動，並且有相應嘅物理表現，而對人類角色嘅互動亦非常有趣。好似要偷野的話，就要先於適當距離等待或跟隨，再觀察該人類角色習慣先行動。如果想玩水桶笠住目標呢類高難度動作，就需要更精密嘅計算。

一步步引愚蠢嘅人類跌入圈套

偷走相關物件引目標追你

《Untitled Goose Game》已於 2019 年 9 月 20 日推出，對應平台分別有 Nintendo Switch 同 PC Epic Games Store（限時獨佔），不過都係推薦玩家買 NS 版，鬼叫 Epic Game Store 送木馬，真係不了。