文長，涉及劇透，總結在最尾，想睇評分可直接跳到最後。
「在不明白一樣東西的時候，如果不去研究，就說那個東西不科學，這個態度才是最不科學的！」
衞斯理講既意思大概係咁，我已經唔記得左係邊本書，而且倪老先生已經改版改左唔知幾多次，係咪原文大概已經無所謂。
“If we knew what we were doing, it wouldn’t be called research, would it?” —Albert Einstein
其實係日常生活中，唔知你有冇一啲硬係覺得一定要咁做既野存在？又有冇啲咩，你身邊既人明明冇所謂科學根據但係佢地都信？如果冇既話，玩完《Control》可能會有。
係《Control》既世界入面，「Federal Bureau of Control」對所有「非科學」既事件都做實驗，而且加以監察。靈異事件、宗教儀式、供奉、風水，甚至乎神話全部都係真。有好多人話佢既怪奇物品設定好似《SCP》系列，甚麼乎係左抄右抄。可能係掛，但佢本身有自己既世界觀，故事，角色同敵人，一如其他正常遊戲，其實有參考既部份都唔係重點來。
實際上，我地所認知既科學，都係遵從一個個步驟發現而來。
正如中小學實驗用火煲滾水一樣，唔可以淨係觀察到有火就會煲滾水就算。要知道點解就係所謂研究，跟住我地發現其中既能量交換，要用幾多能量，點解會有沸騰呢個狀態，點解會變水蒸氣，全部都係研究。有人覺得風水或者儀式係work，其實唔應該一句怪力亂神就 BAM 左佢，對所有未知既狀況進行觀察同埋實驗，我地可能會知道更多世界既真相。
以下我地來睇下遊戲既優缺點。
超能力，型！
呢一句已經概括左遊戲好多方面既長處，第一樣當然係戰鬥系統。
自從《Star Wars: The Force Unleash》之後，已經好耐冇見過隔空移物得來係會爽快既戰鬥。好多超能力遊戲例如《Dishonored》、《Prey》等等都係用超能力來潛行，感覺好壓抑。近年來比較爽快既超能力戰鬥已經係《Spider-man》同埋《刺客信條》系列。不過始終唔夠《Control》來得簡單而華麗。
除左係《Star Wars: The Force Unleash》既基礎上將場景既大部份物品都可以用來投擲之外，《Control》更加比你拆爛成個場景既大部份，甚至可以自己選擇由唔同方向擲向敵人，就算眼前咩都冇選擇，佢都會自動幫你求其執著野來掉。掉唔同既野，由唔同既角度掉，仲可以有唔同既效果，係簡單既按鍵操作之中，無意間令玩家多左無數既戰略選項。
而且隔空移物只係其中一項技能，由無數廢物組成既盾牌升級後一樣可以變成炮彈咁射出，攻守兼備。但超能力本身好玩只係遊戲其中一個優點，超能力呢個Idea 要好好地表達到出來，必須要遊戲其他地方做配合。
例如係場景破壞。《Control》既場景破壞可以講得出係現時執行上最先進最完善既一個遊戲。遊戲既場景除左玩家必要行既道路之外，大部份既擺設同埋柱牆全部都可以由敵我雙方毀壞。而毀壞甚至只係第一步，被破壞撕開既柱牆石屎竟然可以分裂出來成為物品再次投向敵人。淨係呢一個部份已經搵唔到第二個遊戲可以做到。
又或者係畫面。通常我評論遊戲好少講畫面，畢竟呢 D 只係 Budget 作怪既事，有幾多錢就有幾靚，但我唔係討論佢個 Budget 嘛，所以多數唔講。但《Control》真係不得了，尤其係電腦版作為「Nividia Ray-Tracing（即時光線追縱）」既重頭展示作品，係第一次有遊戲從場景以及人物既多種角度同時使用 Ray-Tracing 技術，相對地對電腦既硬件要求會提高好多，但同一時間係超能力特效方面，諸如爆炸，火光，被破壞既場景表面除左傳統曲面細分之外再加埋 Ray-Tracing 等等，全部即使再上一層樓。
如果電腦硬件跟得上既話，呢隻可能係第一次 Ray-Tracing 技術對於遊玩滿足感有影響既遊戲。
題外話，Remedy 當年既 Alan Wake 都係 Intel 用來展示自己雙核心 CPU 既處理能力，跟住 Quantum Break 都係用來測試電視劇溝遊戲既 Idea 可唔可行，呢間公司都可謂係勇於嘗試既代表
著重於探索以及故事
《Control》比起 Remedy 之前既任何作品都更加著重探索以及故事，實在令人驚喜。雖然前作《Quantum Break》都有少少睇文字、聲音紀錄既元素，但係《Control》多好多倍。再加上遊戲既主要舞台「The Oldest House」重採用《惡魔城》式既設計，玩家係主線過左某個部份先開始開到前期就出現既房間。亦有啲不必要既通道係需要完成支線先可以開到，入面除左有少少製作用素材做鼓勵之外，更多既係對遊戲故事內側面描寫既文字或者聲音紀錄。
《Control》被人話佢似《SCP》主要原因係佢捕獲異界物品既時候好多時都會寫捕獲報告，其後又點樣收容佢地，而呢啲短篇既小故事就成為左異界傳說故事愛好者（即係大多數《SCP》既愛好者）既必收項目！
除此之外，The Oldest House 入面有好多地方更加係冇直接可以去到既路，要靠玩家用超能力移動方式自己去發挖，搵到仲會送技能點添！
而遊戲既支線有部份更加係自由觸發，當中隱藏左遊戲內非常少有既主角衣裝，同埋更重要既…..隱藏BOSS！呢個係遊戲既優點同時係缺點。《Control》既隱藏 BOSS 好多時出場已經要你玩一輪 Jumping puzzle，入到去仲要諗點打，要搵弱點再加特別打法先過到，真係唔易架！
相反主線既BOSS 呢……其實主線就係冇BOSS 既，只有雜兵，好多雜兵，好L多雜兵同埋勁啲既雜兵無限咁堆條血路比主角殺。遊戲既關卡設同BOSS 設計如果你唔去搵支線打，就等同於浪費，我都唔知嬲好定笑好。
呢種用技能點、製作素材、故事同埋隱藏BOSS 作為利誘，吸引玩家去探索既方式唔新穎，但只要獎勵公平，任務好玩，就自然能夠引起玩家探索既意欲，而呢個意欲就自然成為遊戲既賣點之一！
跟住又到左遊戲既缺點。
角色表情生硬（淨係主角）
其實淨係得一個角色既表情係好生硬本身就好難做到缺點既，最大問題係玩家好大部份時間都要對住主角既大頭丫嘛！主角就算係平時傾計，一個人都做足兩個人既戲份，明明成日望住佢但係佢個表情又會越來越面癱，點搞呀！初頭以為佢係《Mass Effect: Andromeda》咁個個人都有事，點知又唔係。當主角搵到少有既活人 NPC 傾計之後先發現大家明明都好正常！係演員有問題定係點樣呢？
嗯…..因為有人同我講過點解《Control》入冇一套衫係可以 J，所以特此附上 Jesse Faden 既 J 圖一張，請笑納。
個地圖……個死人地圖！
作為一個以探索為賣點既遊戲，地圖當然係非常重要啦！暫時呢啲遊戲類型來講，我見過最詳細既應該係《Dead Space》系列，個 3D 地圖真係將會一層層分開表達哂出來，樓層之間既連接都睇得清清楚楚。
而最有用既地圖，就當然係今年既《Resident Evil 2》重製啦！雖然幾層建築既地圖佢冇 3D 畫哂連接出來，但係所有門開到開唔到，甚至係點開，而開完之後入面又執哂野未，佢都會一一提點你，唔洗你行來行去掃房諗自己有咩未做。大佬呢啲先係地圖架嘛！
《Control》果張死人地圖！明明「The Oldest House」就可以無限層數，你一層還一層都算，我都唔要求你畫到 3D 咁。你都唔好全部層數疊埋一齊丫！成個地圖除左知主角既大約位置之外係冇任何其他作用。NPC 係邊，唔知。樓梯電梯係邊，唔知。我而家係第幾層，總共又有幾多層，唔知。邊度門有鎖冇鎖，有鎖咁主角有冇鎖匙，唔知。入到間房主角睇哂文件聲帶，執齊素材未，唔知。乜都唔知我要你做乜呀！
冇喇！遊戲除左其他更輕微既BUG 之外，其實冇乜太多既缺點，而至於本人覺得係最大優點既FBC 背景，因為唔想劇透太多既關係就唔討論落去喇，以下係評分。
總結︰各方面誠意之作，睇埋個故事今年十大走唔甩
《Control》雖然係一隻遊戲時長比較短既小品之作，但係故事、戰鬥、探索等等都落足心機，務求一次過令玩家得到全面既體驗。當然危機最後既解構都仲要靠後面既 DLC，不過今次都算抵食夾大件喇！
（利申︰Peter 我買既時候 EPIC store 做緊 Pre-order Discount，只係 33.99 USD（HKD 276）啫。我買完之後正日返去睇佢已經做返 54.99，所以我講既抵食夾大件同你既理解係會有少少既分別）
編輯部按：唔鍾意 Epic Store 嘅朋友，遊戲仲有 PS4 版本，玩家們可以留意返！
遊戲基礎分︰90
雖然只係一座「建築物」入面唔能算係乜野史詩級大作，但係如果世界觀拓展開來既話，主角出外查案可能會成為一個長期受觀迎既新IP！
最終評分︰89
係個遊戲界面同埋地圖扣左少少分，總括來講非常值得一玩！
VJGamer 歡迎讀者投稿 – 如蒙投稿，請將文稿、筆名、作者簡介及聯絡電話，電郵至 [email protected]。
人生如遊戲，我就係PETER，玩既係人生，唔會有個更好既名。
有時寫下評論，多數介紹下GAME。分享、批判遊戲。