由白金工作室製作、桂正和老師擔當人設嘅 Switch 平台限定遊戲《Astral Chain 異界鎖鍊》早於 8 月 30 日已經推出，遊戲上架之前編輯部對佢期待甚高，男同事表示「有桂正和！」，女同事表示「係白金！」，所以大家都急不及待準時開 Game。

不過，一周目通關以後，感想係：遊戲唔係唔好玩，不過又真係無想像中咁「非玩不可」，以下黎同大家分享下我嘅感想。

《Astral Chain》係一隻頗為單純嘅動作遊戲，時間設在距今許多年後的未來，主角擔任特殊警察部隊「聶倫」成員（雙胞胎姐弟之中選一性別），生活喺「方舟」上面；而「方舟」不斷受到黎自異界生物「奇美拉」嘅攻擊，所以主角所屬嘅「聶倫」部隊，就利用「異界鎖鍊」去操控已馴化嘅「奇美拉」（雷基因）去對抗外敵。

好多專有名詞，不過玩家入 Game 無幾耐應該就會熟習。

本文題目中提到「劇本平淡」呢一點，唔知大家有無共鳴。故事每個章節，於節奏上嘅編排都非常類似，只係你進入嘅地方有咩分別、以及到底會遇到幾多支線。喺唔劇透嘅情況之下，我會形容劇本為「非常平穩」吧？其實玩家一路推主線，一路都會大約估到情節會點發展、邊個係真頭目、邊啲野會產生問題等等，唔算有特別驚喜，發展都在意料之內。

不過，當然，神谷英樹嘅作品，又或者講白金工作室，一向都唔係主打要創作宏大嘅故事劇本（《NieR: Automata》並唔同，劇本係由橫尾太郎老師寫的，並唔算係白金工作室嘅成員），反而重點係呈現炫麗動作、妖異嘅未來感等等視覺衝擊上面。所以《Astral Chain》同《Bayonetta》至少有一樣共同點，就係：喂，擺明個遊戲就唔係最重視故事性架啦。

好，既然故事劇本唔係遊戲主打，我地返去講重點：動作。

剛剛入 Game 時，要同時操作「劍式雷基因」去進行攻擊，的確有少少混亂，所以我第一章好聽話咁，去左狗屋警局訓練室熟習操作，上手之後馬上覺得遊戲性強了許多。

唔同場景都有需要玩家使用唔同「雷基因」去通過嘅地方，但係面對敵人時要使用邊隻「雷基因」去打，大部份時候都視乎玩家嘅喜好。遊戲難度，係有的，因為去到遊戲中盤嘅頭目戰，除左會有扣血地形，敵人攻勢亦會變得非常密集，除左遠距離攻擊、亦會有捲起強風令玩家扣血等技能。

爽快度是有的，難度也是夠的，我經常喺「對等」以及「困難」兩種難度中遊走。

不過，視點問題真係幾影響遊玩體驗，一來好多時要開 IRIS 黎 Scan 現場有咩紅色污染物，Mono Tone 色調真係睇到對眼好攰；二來，視點經常有「唔知點解飛左上頂」嘅奇怪問題，我問過其他玩家朋友，佢地都話有時個視點係怪怪地。假如你玩緊一啲要追犯／需要平衡度嘅支線，個視點出事，都真係會有少少黑人問號的……。

講起支線，用一個正面嘅講法黎形容嘅話，《Astral Chain》真係好抵玩，因為每個 Chapter 都有一定份量嘅支線（例如 Chapter 8……），鍾意玩小遊戲嘅朋友，或者會好開心嘅；但係對於淨係想衝主線，但係又有強逼症嘅玩家（舉手）黎講，咁多支線，真係有好有唔好啦。

倉庫番支線。好難玩。

我個人就麻麻地，特別係遊戲入面都有幾多講求速度／平衡度嘅支線，頭先都講過，視點會有影響之餘，如果講起平衡度支線，相信大家都會記得遊戲中最為嘔心嘅一個任務，就係嘗試買十球雪糕運上天橋比個小朋友，又要避開衝埋黎撞你嘅 NPC，又要保持平衡。

呢種搬運任務，或者係想善用一下 Switch JoyCon 嘅機能？如果唔係，除左呢兩種任務之外，我覺得呢個遊戲，擺喺 PS4 上面推出可能於機能上面會更能發揮。

其實可以唔買十球，但唔買十球就無意思 orz

綜觀黎講，如果你係追求動作打擊爽快感覺；或者；唔想花時間去理解劇情；又或者想要一隻單純「幾好玩」同埋「好襟玩」嘅遊戲，呢隻《Astral Chain》絕對係穩健之選。

當然，我地認為遊戲入面似乎有一啲可以改善嘅地方，但呢樣都係因為出自我地對「白金工作室」嘅高要求（笑）相比起《Bayonetta》，《Astral Chain》的確未算特別出色，不過不失，我地認為如果你未入手遊戲嘅，又真係唔急在一時，畢竟 2019 下半年遊戲很多呀～。

P.S. 有興趣買嘅朋友，記得支持 Online Shop 同水貨丫，唔好買錯行貨！