之前喺 E3 遊戲展上發表嘅復仇者遊戲《Marvel’s Avengers》，因為無放過試玩台出黎，所以實際玩落係點大家都係得個估字。日前我哋同少數香港媒體受邀參與《Marvel’s Avengers》媒體秘密試玩會，老實講玩完之後對隻 Game 信心大增，只要作出少少修正絕對有機會成為 2020 年黑馬遊戲！

我哋今次試玩版本同之前 PlayStation 放出黎條 Footage 係同一版本，亦即係遊戲序章。《Marvel’s Avengers》係會有全新故事及背景，所以並非係電影嘅延續。遊戲由曾製作新版《 Tomb Raider 》（盜墓者羅拉）工作室 Crystal Dynamics 聯同 Eidos Montreal、Nixxes Software 及 Crystal Northwest 共同開發。

製作人 Casey Lynch

遊戲初期會有五位可玩角色，分別係美國隊長、Iron Man、黑寡婦、雷神同埋 Hulk，而製作人 Casey Lynch 喺試玩會中透露未來會陸續有其他角色及劇情以 DLC 形式登場，最重要係費用全免！另外佢順便確認埋第六位登場復仇者會係蟻人。

實際遊玩其實無乜機會見到正面，就算面相同大家熟悉嘅面孔有分別都無乜所謂，屎忽似咪得

講返遊戲試玩部份，同一般動作遊戲操作相似，主要攻擊都係分輕、重攻擊鍵，另外仲會有角色獨有必殺技。但係本作有個地方做得好好，每一位復仇者都係獨立設計，不論係拳腳判定，特技都截然不同，最正嘅部份角色例如 Iron Man 係會有高速追擊模式（好似飛機 Game 咁玩）同一般戰鬥模式，完全落足心機去整，唔似隻《Marvel Ultimate Alliance 3》咁差唔多隻隻角色招式都差唔多，高下立見。

Iron Man 追擊模式，速度有少少慢，但都幾好玩

亦有一般戰鬥模式

另一樣值得讚嘅係製作團隊好用心去表達出每個角色之間嘅差異，例如雷神可以儲力放電同掉雷神之鎚，而個鎚收回時都會有攻擊判定，亦即係話可以靠走位去擊倒多位敵人。而個人最欣賞嘅就係 Hulk，招牌技「Hulk Smash」還原度十足，又可以隨地拆野做武器，非常爽皮！

雷神掉把雷神之鎚係幾好 Feel，聲音又清脆

炸地演出好有逼力

隨地拆野是常識吧

又點少得拍手

除咗固有招式外，每隻英雄都會有自己專屬裝備、技能樹等等，即使同一隻英雄都可培育成唔同戰鬥風格，製作人亦都講明無規限角色定位，將黑寡婦培育到變坦都得！不過多人連線時就無法使用同一角色，有點兒可惜。

黑寡婦都好勁下，試玩版 Boss 係Taskmaster

必殺技「隱身」

《Marvel’s Avengers》動作部份就做得非常好，不過喺會上製作人 Casey Lynch 講解遊戲任務系統時就有少少失望啦。本作雖然最大可支援四人連線遊玩，但係就並非全部任務都可以 Co-op。遊戲中會分單人故事任務及可多人遊玩嘅 Warzone 任務，需要通關單人任務後先會開啟相關嘅 Warzone 任務，亦即係會出現打晒堆多人連線任務之後，再返去推單人故事開新關卡同朋友遊玩，頗為無癮，希望正式推出時會有所改善。

《Marvel’s Avengers》預定於 2020 年 5 月 15 日推出，對應平台為 PS4 / XBox One / PC。