黎緊有唔少大作推出，而當中其中一隻最備受關注嘅遊戲，相信非《新櫻花大戰》莫屬。自從遊戲以及人設公佈以來，新玩家猶自可，但大部份舊玩家都不約而同地有一種「期待同埋好怕受傷害」嘅心情。今次 TGS 2019 編輯部就有機會與《新櫻》遊戲製作人片野徹先生進行訪問，佢透露咗唔少遊戲資訊，各位讀者朋友可以作為參考。

片野徹先生於 1993 年入職 SEGA，一直都係負責《超音鼠 Sonic》遊戲系列為主。

在場好多記者都好奇，唔係原版《櫻花大戰》出身嘅佢，點解會與《BLEACH 死神》嘅作者久保帶人老師合作、並選擇由佢去擔任人設呢？原來，原因好簡單，因為片野先生同久保老師以前就合作過，既然大家都熟，就不如一齊合作做《新櫻花大戰》咁話。

久保帶人老師版本《新櫻花大戰》

《櫻花大戰》1～5 代人設

至於點解遊戲會由以前嘅戰棋遊戲，變成今次嘅動作遊戲呢？片野先生話，呢個問題有好多記者都問過，不過，佢個人認為《櫻花大戰》當年，技術無而家先進，所以先要做戰棋遊戲；而家技術先進咁多，應該就要做返動作遊戲，先至貼近而家嘅世代咁話。我地現場試玩過《新櫻》，的確已經變成一個非常單純直接嘅動作遊戲，與「戰略遊戲」絕對是沾不上邊了。

既然做動作遊戲，而遊戲中又有今集被稱為「靈子戰鬥機」嘅光武機體，我地原以為遊戲中會有供玩家個人化機體嘅元素，例如係零件組裝、技能變化等等機體要素；不過，片野先生話，呢啲元素一個都無，因為想玩家淨係專心享受戰鬥裡面嘅動作部份。

佢同時亦補充，今集無明顯嘅升級或者強化機體條件，反而想玩家專注喺攻略角色上面；因為與角色之間好感度越高，戰場上嘅能力就會提升，亦會更加容易出到特別技能。

而喺 TGS 四日入面，亦有唔少關於《新櫻》嘅情報公開，包括遊戲中新敵對角色「夜叉」，造型酷似真宮寺櫻，聲優同為橫山智佐，不過戴住面具，目前未知真正身份、以及與新花組敵對原因為何。消息一公佈當然引起網友熱議，希望「夜叉」嘅角色唔好破壞真宮寺櫻形象。

《新櫻花大戰》定於 2019 年 12 月 12 日推出，未知大家對於呢隻全新形象、被製作人形容為「貼合而家年代」嘅遊戲有咩感想，又會唔會期待呢？

以下為《新櫻花大戰》PS4 遊戲 OP 動畫：

延伸閱讀：
【遊戲新聞】大小姐神崎堇歸位《新櫻花大戰》擔任支配人＆總司令！不過人設大家受唔受？