文長，涉及劇透，總結在最尾，想睇評分可直接跳到最後。

火焰之紋章（台譯︰聖火降魔錄）距離上一隻正規作品都已經四年，對上一隻係家用機推出既系列遊戲就更加之耐。終於，係絕大部份遊戲內容都係光榮代工之下，我地得到次世代主機 Switch 上面既正統火紋。

係遊戲形式同故事上，可以話係同傳統火紋有頗大分別，但總的來說由光榮處理既幻想式三國演義，係優點遠多於缺點既，只係遊戲可以或者我希望佢可以改善既野實在太多，希望大家唔會誤會啦！

用四個角度訴說的故事

今次火焰之紋章既故事，如果理解正確的話，又已經搬左去另一個時間線開左一個新既背景世界。（你冇睇錯，其實以往咁多集既火紋，有大部份都係連貫世界觀故事來）係重新構築既世界觀入面，呢片被幾家勢力爭奪緊既大陸同一時間受到內憂外患，呢個動盪既時刻就係故事既核心。

其實光榮可以話係呢個背景入面玩盡所有花臣。女神所創造既大陸同埋主角身處既時代背景，其實混入左《Xenoblade 2》既元素，而主角每一條線都會睇到呢片大陸現正存在既問題既其中一部份。而每一個角色既外傳故事，再加上每一條線本身限制某 D 角色既外傳故事既出現與否同埋版本，令到玩家無論玩幾多次都好，如果唔仔細討論研究攻略，總有大部份既故事會係當中缺失。成件事既做法同《Octopath Traveler》非常類似。

而其中故事內容一但會由玩家得到不同既角色或者係好感等級而出現差池，就已經體現出遊戲有一個絕對既深度，係要依靠好多人力物力去思考、試玩、實行，咁成品先會盡量少出現故事上既邏輯問題。其中唔單止係文本，仲有動畫、配音、關卡設計等等，完完全全體現出大作既價值。

要建立咁多富有特色，背景故事既角色，而同一時間佢地既故事又要同主線有關連，可以令玩家得到有用既資訊，最後推導劇情發展。唔好話做，淨係諗呀，班西方廠商都已經唔夠膽諗。於此可記一功。

利申，四條線既遊玩順序我建議係女王線先，呢條線較短，比玩家一嘗為溝女征服世界既故事。之後可以正經地睇返芙朵拉既真正鬥爭，咁就係教團線。青獅子線就比較個人，主要係講述王國同帝國因為某啲事而捲入戰爭既果個某啲事係乜野。金鹿線就比較似三個家族之中既外人，最後做既亦唔係征服世界既故事，而係去左考古，補充返芙朵拉真正幕後黑手既故事。四邊睇哂就會好完滿喇！

沒有對錯，只有信念

而佢比得四條線你去揀，咁就自然有誘導你去揀既特色。風花雪月整體上來講係一個成人遊戲，唔係因為佢有談情說愛既成份，而係因為佢所有選擇都係灰色既。大部份既普通人，甚至係…..應該話特別係打開機既朋友，總係相信呢個世界非黑即白。或者我地咁多年來比三國演義耳濡目染，硬係相信劉備就一定係好人，曹操就一定係仆街，孫權就一定係食花生。

當然唔會係咁。幸好近年來都有唔少遊戲提出灰色選擇呢個概念，例如係《The Witcher 1＆2》，就出現左無論如何你都必定要揀既政治選擇。初時我都會覺得好苦惱，因為無論邊一邊都有佢自身既利益想達成，而任何一邊都有主角自己想得到既利益。即使唔用二元對錯呢種幼稚想法去揀，都非常困難。

“But that is politics, you have to pick a side.”

玩《風花雪月》既時候，我突然間就有《The Witcher》既回憶返哂來。主角只係一個被陰謀扯左入去既狩魔獵人／老師，而狩魔獵人組織／學校（修道院）仲要講到明佢地係唔會參與政治架嘛，咁關我個主角咩事呢？

呢個亦係將我由政治冷感既細路變成關心政治既成年人既真相︰主角都係人，而只要係人就一定同政治有關，而當社會政見分歧既時候，你就一定要揀一邊，唔可能中立。政治其實就係空氣，生而為人你有吸空氣既需要，你就必需有吸空氣既權力同令空氣可以繼續吸落去既責任，因為除非你死左，如果唔係你冇得揀唔吸。

然後你又會發現，當初難揀係因為世事冇話邊個一定啱哂，咁我應該用咩準則去決定自己應該幫邊邊？

咁就只可以睇你作為一個人類，相信啲乜野。就《風花雪月》既故事來講，黑鷲女王線相信既係女王既願景，而要實現就必須要先統一天下。即使係統一既路程中用乜野旁門左道，只要成功都冇所謂。女王相信由女神而起既階級鬥爭必須要終止，先可以建立到所有人都有機會幸褔既世界，但同地底暗黑蠢動者合作，就被其他人視為被利用既愚昧行徑。以錯誤既手法完成正確既目的，算錯嗎？

教團線既蕾雅就一心只想母親係主角身上復活。佢保守住大陸既秘密，千百年來同暗黑蠢動者作戰，為既就係呢一縷思念。佢千百年來維持住和平，而呢一刻為左和平佢再次將帝國既人民同江山殺害同破壞，咁又算好人定壞人？

你只有選擇相信其中一邊。

去到呢一刻，你全個腦諗緊既可能係︰我又唔係老師，又唔係咩命中注定世界最強，我揀邊一邊，又有咩所謂丫。

我唔同意，我地係普通人，而戰爭中普通人最多都係做個士兵，但指揮官冇哂士兵，仲做到乜野？我地唔可以忘記我地永遠有自己既自由意志同生命，可以為自己相信既事作貢獻。

而就係呢種選擇，將玩家置身於同現實微妙地相同但係又完全幻想既處境之中。令遊戲變得有趣之餘亦對於玩家既人生有左意義。

而家講下遊戲既缺點：

畫面仍需改進

呢個冇得拗啦！即使 Switch 再點樣係機能上有缺憾，都一定唔會以呢種級數既畫面作為上限囉！遊戲除左戰鬥之外，大部份時間屏幕上既人都唔多於五個，但係唔知點解所有談話既場面都係用一個超級核突既背景頂住就算。而且大頭既人物係衣裝上既細節都有欠奉，可以話係 Fan Art 都認真過佢。

戰鬥方面，無論你學左咩神技都好，咩終極魔法都好，個戰鬥特效都係得果堆「五毫子」罐頭特效，即使相比起越做越頹既機械人大戰，都可以講「真係好鬼死頹喎！」

不過，我地都明白佢既錢係用哂落去故事同配音果度，所以都唔算係一個太嚴重既缺點來。

以下我地再講講可以改善既地方：

策略遊戲唔夠策略

《火紋》系列既策略遊戲玩法其實去到而家真係可以話追唔上時代。西方 CRPG 再次興起，大家又再開始玩返回合策略，發現其實好多玩法係以前未做過，而《火紋》係可以參考。包括戰場高低差可以影響遠距離攻擊既射程同傷害，咁你飛馬弓箭手或者飛馬騎士用魔法先同其他職業有大分別嘛，淨係得移動距離有影響真係需要開多個職業？

又或者場地魔法。我有時真係唔明，點解人地劇情就可以放火，我地入去打就唔可以救火？我唔係話要整到好似《Divinity: Original Sin》咁又要火溝水溝冰溝電咁…….咁起碼都要我方可以放火同救火丫？盜賊點解唔可以投毒同埋打暈人？成個遊戲都冇乜邊幾關係必須要解鎖先過到，盜賊呢個職業除左偷少少野仲有乜用處？

點解會冇鬼左屬性相剋？咁帶唔同既武器上戰場除左係因為個角色練緊之外有咩意義？魔法又點解冇屬性相剋？點解冇死靈魔法？

點解到今時今日弓箭手／魔法師都唔可以監視／掩護射擊？佢地行前又啱啱好打唔到人，下回合仲要比人衝過來收埋皮，即係叫佢地唔好行啦！明明佢地有監視射擊既話就可以留移動力到敵人回合果陣，人地一衝過來就遠距反擊，仲可以幫前面既近戰做掩護，成件事根本戰術倒錯。

缺少角色自訂選項

其實火紋系列一向都有角色羈絆對話，升級轉職，能力值技能仲有裝備系統等等，根本就係 RPG 來，咁點解我地從來都冇得自訂角色？每一個角色既性格、對話同戰鬥風格都係獨一無二，今集我仲搵唔到之前可以請僱傭兵既系統，加上時間倒流系統，根本就玩來玩去都一定係主角學生群。

既然佢地咁有特色，點解可以冇衫換？我都唔祈禱你可以好似 Xcom 咁比玩家自訂裝備樣式，咁你起碼都可以提供多幾個預設既款揀下丫！大家都知我好憎課金買 SKIN，但今鋪我真係前所未有咁想光榮整到《Dead or Alive》咁，你可唔可以比我買件衫呀！

難度偏低

我都知有好多人會跳出來講，喂其實你係咪玩完個普通難度跟住就話偏低呀？其實隻 Game 有困難，而且仲有 DLC 解鎖既超難果D 架喎！我知，我知，但係《火紋》個難度低唔係體現係呢度。而係體現係佢可以無限刷關果度。除非你同我講去到困難或者超難，玩家就唔可以用無限自由戰鬥來刷經驗值啦！我見過有人刷到全隊 99 LV 呀………….個數值係去到根本冇人打得中你，而你打乜野人都係一下秒，你有得刷等級而敵人唔跟等級，咁個難度係邊呢？

《火紋》設定係一個戰爭既世界，至少後半部係，但成個遊戲缺乏左好多戰爭時期應該出現既要素。我個人對於策略遊戲來講，真係好推崇現代版既《X-COM》。尤其係佢第二集加入左敵人步步進逼既升級系統，令玩家唔可以再靠打支線戰鬥不斷咁刷等級，已經令成個遊戲節奏緊湊好多，亦都唔會變相鼓勵玩家去多支線而令遊戲時間無謂加長。

再加上戰爭期間敵人肯定係會隨時打你，而唔會次次都係你搵到人地來打，你咁樣我會極度懷疑對面既智商，而且根本就唔似係打緊仗。直接取消無限刷既關卡，然後將平日既時間變成敵人隨機對你發動攻擊，而你要去應對轉而變成升級手段，會令成件事緊張刺激好多。

同埋經典模式標謗會永久死亡既玩法入面竟然冇傷兵懲罰……..大佬呀！我拉埋其他班既人過來，我仲有老師同其他配角，我成二十幾個人呀！而你每次戰鬥都淨係可以出九至十二個，你唔用傷兵懲罰阻止我無限升同一隊人，我點用哂手上咁多個角色呀？我用唔哂，我拉人有咩意義呀！

總結︰期待系列之後既改進

等左咁多年先終於有高清化既火紋，成個遊戲質量上係非常穩妥，有啲地方更加可以話係超班。可惜相對於咁多年既作品，同埋市場上越來越多既 SRPG 作品來講，火紋既戰鬥系統已經漸漸變得老舊同冇新意。如果再唔參考市場上其他人既特色，快馬加鞭去改良，等到《火紋》FANS 發現同種類既新款遊戲時，可能已經恨錯難返。

遊戲基礎分︰90
淨係睇文本量同欣賞劇情設定，已經值呢個分數

+遊戲質量豐富，故事引人入勝
-戰鬥系統過於單調
-角色人設雖好，可以自訂更好

最終評分︰85
下一集既《火紋》必須要全速改進，否則會被玩家淘汰。

VJGamer 歡迎讀者投稿 – 如蒙投稿，請將文稿、筆名、作者簡介及聯絡電話，電郵至 [email protected]。