KOEI 光榮於 9 月 5 日正式公佈，即將會推出《FAIRY TAIL（妖精的尾巴／魔導少年）》原著故事為藍本嘅 RPG 遊戲，對應平台為 PS4／Nintendo Switch／Steam，預計 2020 年發售；而喺黎緊嘅 Tokyo Game Show 2019 嘅最終日，亦會有舞台活動透露更多遊戲詳情。

《FAIRY TAIL》由真島浩（真島ヒロ）老師創作，原著漫畫於全球發行部數已超過 6,000 萬部，動畫化後更加將作品人氣推至更高峰。今次嘅遊戲版，同樣地將由真島浩老師本人負責監修，而劇本則與原著故事一樣，將會圍繞「魔法・龍・公會」嘅主題，以及以「Fairy Tail」公會作為故事中心。

今次負責遊戲開發嘅兩位負責人，分別為 KOEI 嘅鯉沼久史、以及曾擔任《零》系列開發，而家負責《鍊金術士》系列監修嘅菊地啓介先生。到底遊戲詳細玩法係點，我地去到 TGS 2019 會再為大家跟進！