揮別桐生一馬，以手機版主角「春日一番」擔綱嘅全新《人龍》作品《人中之龍 7 光與暗的去向（龍が如く 7 光と闇の行方）》終於有正式發售日，為 2020 年 1 月 26 日，對應平台為 PS4。

春日一番係「東城會 荒川組」嘅小混混，為左幫當時嘅組長荒川真澄頂罪，坐左 18 年冤獄，原本以為自己係「報恩」，係「為組長付出」，自己去頂罪，係「忍辱負重嘅任務」。但係，佢出獄一刻，一個成員都無黎迎接，先發現自己根本只係單純嘅替死鬼。

到底春日嘅極道之路會係點樣，就係今集故事嘅重點。

如果係《人龍》系列忠實玩家嘅朋友，對於今次呢隻起用全新主角嘅《人中之龍 7》應該抱住「期待又怕受傷害」嘅心情，不過官方似乎都明白「只係換左主角，玩法照舊」呢種換湯不換藥嘅做法，未必留得住舊玩家，所以今次於系統上面作出與舊作完全不同嘅改動，將即時戰鬥，變成 RPG 形式嘅指令制。

我地編輯部黎緊九月會去參加東京遊戲展，實機試玩完再同大家分享感受。

至於主角「春日一番」，佢嘅性格同桐生一馬非常唔同，所以作為《人龍》系列多年 Fans 嘅我，對於《人龍 7》都仲係有極大好奇。

雖然《人龍 6》作為「桐生線」結局嘅一集，無論係戰鬥系統、畫面、劇本，都令好多 Fans 有少許疑惑，但係經歷完《Judge Eyes 死神的遺言》之後，相信喺角色模組上面，人龍工作室嘅技術已經更上一層樓了。

2020 件 1 月 16 日，大家買定遊戲等過年吧！