人類史上最嚴重嘅核電事故「切爾諾貝爾核事故」（俄文：Авария на Чернобыльской АЭС，識俄文係咪好勁？）事隔三十幾年，雖然話大多數受影響區域已經被認為可以安全地居住同進行經濟活動，但係該地區仍然係充滿住神秘嘅面紗。你話親身去呢我就唔夠膽架啦，不過打機入去探索我又好有興趣。《切爾諾貝爾》（Chernobylite）日前推出最新宣傳片，展示部份實機畫面以及工作人員實地取景嘅情況，為遊戲上市前作宣傳。
《切爾諾貝爾》由 The Farm 51 製作，屬第一身視點恐怖動作冒險遊戲。故事以 1986 年發生嘅「切爾諾貝爾核事故」為主軸，玩家飾演曾喺核電廠任職嘅物理學家，於事故發生三十年後，決定重回廢土尋找方法搵返人事故而失去嘅未婚妻。
《切爾諾貝爾》有晒探索、收集、製作、生存等等動作冒險遊戲元素，仲會有得興建、升級各種據點。而本作最大嘅賣點就當然係開發團隊曾親臨切爾諾貝爾實地取材並且將之重現，令玩家係整個探索冒險過程中更加像真。當然喺遊戲中會加入因核輻射而產生突變嘅怪物，仲會有稱之為「Stalker」嘅其他勢力潛入者，玩家可以選擇同佢地敵對或者合作。面對同伴死亡、補給缺乏、超自然力量等等威脅，玩家所面對嘅處境將會越見險峻，必需步步為營先有機會生存落去。
之前 The Fram 51 放咗一條長達十七分鐘嘅「Gamescom 2019」遊玩片段，影片展示一段潛入核電廠後事敗，疑似穿越返去事故發生第一日嘅劇情，整體氣氛表現幾唔錯，非常值得期待。
《切爾諾貝爾》預計於 7 月 28 日先於 PC Steam 平台推出，PS4 / Xbox One 版本則預定於 9 月 7 日推出，至於 PS5 及 Xbox Series X|S 就預定今年內推出。
VJGamer總編，細細個已經蒲機舖，機齡甚深，熱愛電玩文化。