《莎木 3》未推出已經從多種途徑多種方法去激嬲玩家，鑊鑊新鮮鑊鑊甘。正所謂「愛之深、責之切」，雖然次次都搞到大炎上，但大家鬧之餘都真心希望官方肯聽意見，當然亦有大量 Fans 好似我哋編輯部咁，由「好想玩」變成「反正都 Back 咗咪玩囉」。點知最近製作人鈴木裕接受外媒 VideoGamesChronicle 訪問時又再一次令外國玩家炎上，無懼玩家怒火真男人是也！

話說喺訪問中，鈴木裕就提到話如果黎緊隻《莎木 3》賣得好，咁《莎木 4》嘅開發計劃就會變得更加容易，而且亦都將會影響黎緊可以得到邊類型合作同伴（潛台詞即係賣得唔好唔洗旨意有下集）。另外佢仲提到《莎木 3》都只係接近整個劇情嘅 50%，希望喺有生之年可以完成整個故事。

在商言商，作品如果賣得唔好的話，唔考慮出後續作品係正常不過嘅決定。但係一隻作品賣得好唔好，除咗因為遊戲本身質素之外，仲有市場推廣、廠方態度、與玩家互動等數之不盡嘅因素。《莎木 3》未推出時已經不停辣慶玩家，唔作出補救之餘仲講到咁嘅說話，無視自身問題再將責任放於玩家身上，好難怪外國玩家會咁嬲。

雖然篇訪問睇到人好嬲，但係鈴木裕身為世嘉特別顧問，佢都有提及佢想回歸去製作新嘅《Virtua Fighter》、《Out Run》，不過仲需要同世嘉去溝通，如果成事的確係機迷嘅福音，話晒當年 AM2 團隊的確製作好多膾炙人口嘅作品，有新作的話我諗大家都會原諒你嘅。

相關回帶文章：

【遊戲新聞】多種方式辣㷫玩家 《莎木 3》再獻新猷