電競比賽越黎越普及，每次比賽奪冠嘅隊伍多數都係 Chok 晒懶係型咁上台，大家都見慣見熟。但係如果我同你講，今次贏嘅係幾個和尚，成件事突然間就變得好爆。根據外媒 Coconuts 報導，日前就有三位泰國和尚贏得一個電競比賽冠軍！

中間三位就係勝出嘅和尚學生，贏嘅項目分別係《極速領域》同《傳說對決》（原來泰國叫 ROV）    照片來源：Nkc Academic / Facebook

今個月 20 日喺泰國嘅 Khon Kaen University’s Nong Khai（中文：唔知乜大學）舉行一年一度嘅賽事《KKU Nong Khai Fair》，喺呢個賽事入面係有埋電競比賽項目，而贏得今次冠軍嘅隊伍黎自一間僧侶中學 Balee Sathit Suksa（中文：唔識譯）入面嘅高中生，佢地贏嘅項目分別係《極速領域》同《傳說對決》，真係「泰犀利」。

《極速領域》中    照片來源：Nkc Academic / Facebook

可能好多人唔知道，其實泰國嘅電競其實發展得幾好，當中亦都培育出唔少高手，例如上星期係上海舉行嘅「DOTA 2錦標賽」冠軍隊伍隊長就係泰國人黎。不過今次和尚隊伍奪冠喺泰國都惹起唔少爭議，例如話佢地唔應該著僧袍打比賽、出家人唔應該打打殺殺等等。而今次陪伴三位和尚學生比賽嘅學術協調員僧侶 Kokkiad，就認為呢種批評並不合理，佢話「其實佢地只係小朋友，呢個年齡需要成長，發展佢地嘅技能以及探索自身興趣，就同其他人一樣」 。

仲有好多其他學生參與比賽 照片來源：Nkc Academic / Facebook

Kokkiad 亦都話佢想比呢班學生一個機會，因為佢地當中好多人係黎自貧困或者破碎家庭，唔應該因為佢地著住僧袍就被剝奪任何機會。 加上佢地每星期其實只係上 20 小時宗教信仰堂，其他時間同普通學生無分別，當中有學生透過電腦課程了解咩叫電子競技，甚至有人每天都會係空餘時間訓練，實在唔應該因為一個人嘅出身又或者衣著去抱有異樣目光去睇佢地。

而 Balee Sathit Suksa 並非唯一一間派和尚學生參加比賽嘅宗教學校，佢地只係唯一獲勝嘅學校，絕對值得自豪！