《鬼ノ哭ク邦（中譯：鬼哭之邦）》即將於 8 月 22 日正式上架，對應平台為 PS4、Switch 以及 PC（Steam）。很多朋友誤以為《鬼》係由 Square Enix 開發，其實唔係，SE 只係遊戲發行商，開發者為 SE 旗下支社、新晉遊戲工作室 Tokyo RPG Factory（TRF）。

TRF 前兩年嘅作品《いけにえと雪のセツナ（I am Setsuna）》 以及《Lost Sphere》我都有玩過，呢家工作室主力製作現代風格嘅傳統日系 RPG，而由《Setsuna》開始，去到《Lost Sphere》，我，或者好多玩家，都抱住支持以及期待嘅心情，去見證工作室嘅努力，以及進步。

所以，黎到今次嘅《鬼》，基本上一開始有預購我已經二話不說買左，後來官方開放免費序章試玩版，我當然亦把握呢個機會，搶先嘗鮮。

試玩版我同時下載咗 PS4 以及 Switch 版，畫面兩邊都唔錯，不過由於遊戲中選用字體較為纖細，所以用 PS4 玩會睇得較為吃力，所以我個人建議入手 Switch 版本會玩得輕鬆一點。

話明係 Demo 版，當然就未能一探故事全貌，不過呢個試玩版，作為導讀算是不錯了，因為《鬼》係 TRF 工作室首次以「即時戰鬥」作為遊玩方式嘅遊戲，所以動作流暢度以及打擊感做得好唔好，可以話係遊戲最新嘅考驗。

我選擇以遊戲最難模式「MANIAC」開始遊戲，不過遊戲裡面嘅動作操作、以及敵人血量，可能仲係序盤關係，難度我覺得仲可以提高少少；至於攻擊動作，尚算爽快，新手都可以一秒上手，就算係唔擅長動作遊戲嘅朋友應該都唔難 Pick Up。

不過，如果你今次係比遊戲事前多次強調嘅「動作感」而吸引嘅話，我會建議你嘅標準唔好 Set 得太高，因為，或者係想所有年齡層或者係靜態 RPG 玩家都可以享受到遊戲樂趣，所以就算我玩 Maniac，不過補 HP 嘅藥水掉落率高，除左部份容易一擊致死嘅特殊怪之外，基本上好少機會命危。

遊戲入面用「技能樹」去解鎖技能同戰技，不過，因為遊戲世界觀係「處於生者與死人世界之間」，所以，一個地圖版圖，係會分成「生界」同「死界」，換句話講，一個地圖玩家需要打兩次！！當然「生界」同「死界」會有互相影響嘅觸發劇情，不過，我就好功利咁諗，一個地圖打兩次，至少方便我儲經驗值……。

比較令我覺得可惜嘅地方係，遊戲並唔係全語音對應，而對白同埋字幕出現嘅時機，有時都會有點微妙的 Lag，唔知正式版會唔會有所修正；不過，遊戲本身已經唔係搵大手聲優黎配，都未能做到全語音，呢一點係令我失望的。

綜觀黎講，以小品遊戲黎睇嘅話，《鬼哭之邦》整體表現，應該都會令玩家收貨，如果你睇完呢篇文有興趣，免費試玩版目前仲公開緊，日、英語對應（視乎你機體本身語言），而今次呢個試玩版嘅存檔，可以過繼到正式版遊戲上面，所以各位朋友今晚可以返去試下，先再決定入唔入手。

以下為官方最新宣傳片：