好多玩家都鍾意玩求生遊戲，呢類型遊戲當中好大部份都係設定係個孤島上面，然後要搵資源生存落去。而今次介紹嘅遊戲《Last Wood》（最後一舊木）就比較特別，玩家身處一望無際嘅海上，能依靠嘅只有一隻小木筏，到底係咁嘅環境下要點生存落去呢？

《Last Wood》故事講述世界經歷一場大災難，絕大部分嘅陸地消失晒，只係淨返啲細小零星嘅島嶼，而玩家就依靠一隻小木筏同你嘅伴侶相依為命。旅途中玩家需要擴張領土，並且招攬更多嘅倖存者加入我方陣營，滿足佢地對水、食物、住所等需求。亦需要幫助佢地發展各自嘅技能、科技，以及人際關係。最後當然唔少得要繁衍後代啦。

由於玩家嘅據點係一隻木筏，可以用船槳、帆甚至係舵黎前進，然後探索尚存嘅島嶼並收集島上物資（完全唔明點解唔係個島上面發展）。而喺木筏上亦可以透過海上養殖、垂釣、收集雨水等方式去收集生存必需品。

遊戲仲會遇上各種危機，好似島上面嘅動物襲擊、其他倖存者掠奪、鯊魚、海怪等等，大家可製作各種陷阱、裝備以及運用策略去擊敗敵人。另外會遇到天災好似係冰雹、風暴等天然災難，需要作出相應措施應對。

《Last Wood》（最後一舊木）將於 8 月 23 日於 Steam 上推出搶先體驗版本，有興趣嘅玩家要留意啦！