香港正於多事之夏，有好多品牌有大陸資金又好、有大陸部門都好，點都會喺微博或者啲大陸社交媒體度表忠；例如好似某果茶店嘅情況，而家香港代理同大陸各執一詞，咁就睇大家信邊一邊啦！
但係，香港起家、贏盡全球嘅 Figure 品牌 Hot Toys，喺佢地官方微博出左個簡體字聲明「Hot Toys是中国香港的品牌，不支持港独。」
大家第一時間即刻睇返 Hot Toys 個 Facebook 同 Instagram 有冇呢份聲明啦，結果一句都冇講過喎！大陸翻牆網民同樣發現原來兩邊說法唔一致，並且表示對香港人講一套、對大陸人講另一套極之可恥，冒住翻牆犯法都去佢地 Facebook Page 留言貼返呢份聲明並且提出三大訴求：
- 請堅持一個中國原則，明確香港是中國的領土不可分割這一事實。
- 請在Facebook上放出相應的聲明。
- 請回應fb和微博刪評的行為，給我國的消費者一個合理解釋。
大陸玩家講到明如果今次得唔到呢三大訴求就集體退訂、罷賣，而香港玩家同網民建議食盡兩家茶禮嘅 Hot Toys 退出香港進軍大灣區。最終會係同政府一樣漠視兩邊玩家嘅聲音繼續出新品開訂，定係講大陸微博被 Hack 之類藉口了事？咁幫襯開嘅朋友真係要密切留意啦！
資料來源： Hot Toys 官方微博 / Hot Toys-Secret Base Facebook Page
幪面超人頭號粉絲，玩具figure 無一不歡，極喜歡玩潛入式遊戲。怎吃也不胖，只因最喜歡「食字」﹗人生座右銘是「自作樂，很快樂」。