今年下半年遊戲界都比較靜，對比以往咁上下時間遊戲陣容的確比較單薄，而黎緊十月就有隻遊戲叫《外圍世界》（The Outer Worlds）比較值得注意但少人講。除咗佢係由初代《異塵餘生》（Fallout）開發總監 Tim Cain 及 Leonard Boyarsky 製作之外，遊戲內嘅機制相當有趣味，因為最近官方就正式確認玩家可以殺晒遊戲入面所有 NPC！

《外圍世界》係第一身動作冒險角色扮演遊戲，故事描述喺銀河系上離地球最遠嘅殖民基地 Halcyon colony，有各方勢力想爭奪呢個地方，而主角就喺呢個時候由太空船冬眠中甦醒，故事就此展開……

本作不單只有《異塵餘生》果種廢土味道，同時又富有該系列幽默風格以及流行音樂，當然亦都唔少得「估你唔到式」劇情等等，喺外國係非常被受期待。而玩法方面就有非常高嘅自由度，角色風格，伙伴等都可以自由選擇。而大家見慣見熟，選擇不同對話、或者做不同決定會影響故事走向元素亦都係會包含其中。

咁上面都講過呢隻遊戲係可以殺 NPC，提到呢樣野大家第一時間應該都係諗起《Dark Souls》系列，不過係 DS 入面殺完部份 NPC 之後係有機會喪失部份功能，所以通常都係進入二週目之前先屠城。而《外圍世界》遊戲製作商黑曜石負責人Brian Heins 早前就有證實過玩家係可以殺晒遊戲內所有 NPC 的，但係為咗令玩家可以喺何情況下都能夠完成遊戲，所以用咗龐大嘅資源去達成呢件事。例如玩家通過暴力方式得到某件物品又或者訊息，喺後續嘅劇情同對話就需要有相應嘅改變去令遊戲變得連貫，不過對我黎講就即係可以開盤已經見人就隊，殺丫！

NPC 代表可以殺

《外圍世界》預計於 2019 年 10 月 25 日上市，對應平台為 PS4 / Xbox One / PC（Epic Game Store & Microsoft Store），Nintendo Switch 版就仲未有發售日期。