對於一個地方嘅政府黎講，你所管治嘅地方出現問題、出現變亂，政府一定唔會認係自己衰嘅，呢啲時候，當然就賴得就賴，而最理想「賴」嘅理由同埋對象，就係「外國勢力」！

今次同大家介紹呢個遊戲《Secret Government 影子政府》就比大家一嘗做外國勢力嘅滋味。《Secret Government》由戰鬥民族俄羅斯獨立遊戲工作室 1C Entertainment 開發，對應平台為 PC（Steam），預計今年 10 月上架。

《Secret Government》以 18 世紀嘅歐洲作為舞台，玩家飾演地下組織（日本叫做秘密結社，好鬼型！）嘅管理人。你嘅目標，就係要不斷擴展自己勢力，將組織裡面嘅特務，送去各個國家嘅政府部門、銀行等重要機構裡面做間諜，從而去影響各國嘅資源分配、或者嘗試為該國挑起戰爭。

喺遊戲裡面，玩家嘅地下組織，大事可以影響「法國大革命」同埋「美國獨立戰爭」等大型戰役，小事可以影響一個國家稅收或者行政，點樣將組織力量擴展至全世界，就係玩家嘅挑戰。

玩家仲要管理旗下特務，因應佢地嘅能力，將佢地派去唔同崗位；同一時間，亦會有其他勢力嘗試攻擊你，點樣用反間計將對方消滅，都係玩家任務之一。

各位想統治世界嘅朋友，可以參考以下呢條宣傳片：