編輯部一直好期待《The Sinking City》呢隻遊戲。

遊戲由 Frogwares 開發，故事以美國著名恐怖作家 H.P. Lovecraft 作品《克蘇魯的呼喚》作為藍本。編輯部自從飽受 FromSoftware 折磨薰陶之下，從此對「克蘇魯」神話有濃厚興趣；加上 Frogwares 之前製作嘅《福爾摩斯》系列都風評唔錯，知道佢地有新遊戲推出，期待，理所當然。

後來，遊戲宣布會有「繁體中文版」，令我地頗為驚喜，因為呢種遊戲唔算大路，估唔到會有廠接黎做翻譯；而遊戲入面劇情複雜，如果有中文翻譯一定可以吸引更多玩家。

不過，好可惜嘅係「天氣不似預期」，《The Sinking City》嘅繁體中文翻譯，真係無好過有！遊戲入面文字極多，翻譯部份，繁簡夾雜，有好多地方唔知係繁體做漏左定係點，某啲支線根本無做到繁中版；亦有好多情況係，喺一句句子入面，可以同時又繁體又簡體。

比個例子大家睇：

睇唔睇得明簡體字係一回事，聲稱有提供「繁體中文」、但係出到黎都仲係咁半咸淡繁簡夾雜，就係另一回事。咁樣對於玩家真係有好大視覺影響，同埋亦都頗唔尊業。相信有唔少玩家都係因為遊戲話有「繁中」先至決定買 Game，點知出到黎根本貨不對辦，唔通真係啪碟處理咩。

繁簡夾雜都算，最惡劣嘅，係翻譯唔統一。《The Sinking City》係一個劇情非常複雜嘅遊戲，又正如我地之前介紹所講，遊戲入面，唔會提玩家「下一步要去邊」，而係要玩家自己於地圖上面標示「下一個目的地」；所以，其他先唔講，地方名嘅翻譯絕對非常重要。

不過，《The Sinking City》嘅中文翻譯（唔理繁定簡）連地方名，都做唔到統一。同一條街，任務欄用意譯，地圖上用音譯，咁已經好大鑊╴例如以下呢個例子。

有一個任務，要我搵「科維塞得小屋」，位於「科維塞得中部」，「德里街」及「蘭丁大街中央」嘅「林肯大街」。

然後，當我進入地圖，發現根本就無「科維塞得」區域。有嘅，只有「卡夫賽得」區域。呢個，係任務第一個翻譯錯誤。

然後，因為之前任務去過「林肯大街」，所以我大概知個位置喺邊。不過，條街咁長，段位都好緊要，「蘭丁大街」喺邊？我搵左一陣，我淨係見到「碼頭大街」。

我決定轉返去英文版。

轉返去英文版之後，嘩，字體同埋名稱都統一哂，順眼幾多。

然後，我亦終於搵到「蘭丁大街」。原來英文係「Landing Ave」，而中文版，就將呢條街，同時賦予「蘭丁大街」同埋「碼頭大街」兩個譯名。

我當時嘅反應，大概係咁。

我唔識講大陸話，我亦相信香港玩家玩呢個遊戲，並唔係想玩「普通話發音聯想法」。面對住呢一連串 Non Stop 嘅低級錯誤之後，呢隻聲稱有「繁體中文版」，Sorry，應該話係連「簡體中文」都做唔到詞彙統一嘅疑似「Google 翻譯版」《Sinking City》，我果斷地離開遊戲。

當然，遊戲本身其實係有樂趣的，當初我係因為有「繁中版」先選擇入手 PS4 版，但係睇完上面嘅例子之後，如果大家想玩呢個遊戲，玩 PC 英文版，絕對係你不二之考慮，因為遊戲裡面好多微細操作，亦好多文字要消化，用 PC Mouse & Keyboard 玩絕對會輕鬆好多。

至於遊戲裡面嘅「槍擊」部份，玩家支槍，真係蚊咬咁大力，雖然遊戲表面上係開放世界，但係其實某啲區域（同埋支線）係要到比較後期先可以去的，如果初期或中盤時一入去，好快會比怪物秒殺，千祈唔好戀戰，勢色唔對就即刻要走佬。

故事方面相當忠於原著小說嘅概念，鍾意克蘇魯黑暗風格嘅朋友，如果你英文閱讀能力 OK，呢隻《The Sinking City》都仲有玩嘅價值……不過可以等佢特價先。

至於 PS4 版？

如果 Google 翻譯生成都可以當做 Localisation 嘅話，我覺得，對於其他認真地做繁體中文翻譯嘅其他遊戲公司，真係非常唔尊重，對玩家亦然。