受到全世界歡迎嘅《Pokemon》系列又有新動向，不過今次就係同中國方面合作。「騰訊遊戲」於 7 月 22 時於微博上面公佈，騰訊旗下嘅「天美工作室群」已同《Pokemon》簽下合作協議，兩方計劃推出《Pokemon》嘅全新遊戲咁話。

「天美工作室群」係騰訊旗下王牌工作室，佢地最著名嘅遊戲，就係大家一定聽過嘅《王者榮耀》，而黎緊佢地仲會推出《Call of Duty® Mobile》。今次嘅消息就未有關於遊戲平台嘅資訊，所以到底係會推出家用機遊戲，抑或推出《Pokemon》主題嘅 MOBA 遊戲……我地諗應該就唔會嘅。

不過，中國玩家方面，意見就頗為一面倒，認為「Pokemon 嘅新作唔好係手機平台」；同時，根據日本日經新聞嘅報導，由於任天堂正準備於中國市場大展拳腳，所以新合作遊戲似乎有極大可能以 Switch 作為平台。

其實《Pokemon》早前亦同網易 NetEase 簽約合作推出《Pokemon Quest》並預計會喺「大中華區」大力推廣，加埋而家騰訊又參一腳，睇黎比卡超黎緊都會相當忙碌呀～。

而喺呢個消息公佈同時，騰訊亦刊出聘請遊戲工程師嘅情報，仲講到明係對象要有開發「3A」大作經驗！騰訊有的是錢和資源，到底遊戲出到黎會係啲乜野，中國地區以外玩家又受唔受落，我地就一齊靜觀其變吧。