世嘉最近非常不走運，《人中之龍》以及《Judge Eyes：死神的遺言》兩個遊戲系列裡面嘅演員接二連三地出事，先有成宮寬貴疑似吸毒事件影響《人中之龍 4》、事隔一個月又到《Judge Eyes》裡面嘅羽村頭子（瀧正則）同樣因為毒品問題，搞到遊戲要下架自肅處理……

而今日，又到《人中之龍 3》以及《人中之龍 6》受到影響。

事關分別喺呢兩個遊戲裡面聲演「東城會直系錦山組 三代目組長 神田強」以及飾演「陽銘連合會系 廣瀬一家若頭 南雲剛」兩個角色嘅藝人「宮迫博之」，被發現有多次違犯經理人合約事件，例如五年前私下接工作，去參與詐騙集團晚宴；亦曾經與金塊強盜案主謀於福岡酒店合照，有收受金錢利益嫌疑；所以其經理人公司「吉本興業」正式宣佈同宮迫「唔可能再合作」並即時解約！

就咁聽，就好似係合約糾紛；不過，日本藝能界嘅玩法並唔係外人咁容易理解，加上「吉本興業」一直都有傳同日本山口組有關係，所以到底今次宮迫博之得罪咩人，相信我地亦都無從知曉了。

不過，世嘉就麻煩啲，到底《人龍》黎緊仲會唔會有進一步修正行動，或者出更新 Patch 落已經推出市面嘅遊戲上面，就要睇呢件事到底影響力有幾大了。

相關文章：

【毒品風波】羽村頭子（瀧正則）疑似吸毒《Judge Eyes：死神的遺言》日本全線下架自肅處理
【遊戲感想】HD 版《人中之龍 4》作為一個舊玩家，我喺遊戲中搵到呢種樂趣……