剛剛於台灣舉辦嘅「2019夏日電玩展 SUMMER GAME SHOW」順利告一段落，除咗各大廠商嘅大型遊戲以外，另外有一隻遊戲亦都非常值得介紹比各位玩家。《Thymesia:記憶邊境》由台灣獨立工作室 OverBorder Studio 開發，全 3D 黑暗風格高難度動作遊戲，雖然遊戲公佈初期都已得到唔少朋友關注，不過自從喺《2019夏日電玩展》攤位展出示玩台之後，受到更多外國媒體注目。

OverBorder Studio 為一個六人團隊，佢地所開發嘅呢隻《Thymesia: 記憶邊境》，喺戰鬥風格以及世界觀構成等方面，都明顯受到 FromSoftware 旗下《Dark Souls》以及《Bloodborne》系列嘅啟發，玩家身處嘅世界，傳染病正在漫延，為左幫「王」醫病以及搵出病嘅源頭，玩家飾演嘅騎士因而踏上了旅途。

圖片來自《Thymesia》官方FB

遊戲以 Unreal Engine 開發，預計對應平台為 PC（Steam＆Epic Store），目前未有公開版 Demo 試玩，不過就官方目前公開嘅遊玩片段黎睇，遊戲唔止難度頗高，操作感覺亦非常講究玩家技巧。

一個獨立六人團隊選擇開發一隻內容豐富嘅動作遊戲，絕對唔係容易。雖然話世界觀啟蒙自其他作品，不過創作團隊亦非常用心，嘗試建立出自己獨一無異嘅故事，《Thymesia》唔止故事設定黑暗，連整個環境構成都帶有濃厚暗黑元素，到底最後製成品如何，相當令人期待。

戰鬥方面，於《Thymesia》裡面，一把武器會有唔同嘅變化技能，如果真係要同《Dark Souls》系列做比較，《Thymesia》嘅戰鬥操作同埋角色動作顯得較為靈敏快捷，到底實機操作感覺如何，我地都好希望有機會試到 Demo 再同大家分享。

以下係官方公佈嘅最新戰鬥片段：