From Software 所推出嘅《血源詛咒》遊戲風格獨特，成功地贏得一班玩家嘅支持，遊戲中嘅服裝、建築物等等都充滿住個性，亦都無乜邊隻遊戲可以比到類似嘅感覺。如果你都係鍾意《血源詛咒》遊戲風格的話，黎緊即將會推出嘅遊戲《GreedFall》就要留意啦！除咗風格同樣獨特，遊戲中所表現嘅戰鬥過程亦絕不含糊，絕對係今年嘅黑馬黎！

《GreedFall》背景設定於 17 世紀，但係就並唔係大家所熟知果個年代。因為遊戲中除咗有該年代嘅槍械之外，仲有魔法存在。故事講述舊世界正在瀕臨死亡，各處瀰漫住污染、人口過剩、致命疾病等問題。當大家都變得絕望時，喺遙遠嘅地平線另一方有一座神祕島嶼，呢個地方除咗有大量財富，仲有機會搵到治療疾病嘅方法，於是主角就同其他人出發，並同島上嘅人交涉、戰鬥。

島上有入侵者同原著民二種勢力，隨著玩家所選擇嘅行動，將會令各勢力之間嘅關係、能承接任務等產生重大改變。而且玩家仲可以自由決定採用戰鬥或者係和平交涉方式來進行故事，玩法都頗為豐富。而遊戲中並無職業系統，大家可以自由配搭各種武器及裝備，同時影片中所展示嘅戰鬥系統扎實，亦有非人類單位 Boss 戰，都幾令人期待。

《GreedFall》預計 2019 年 9 月 10 日發售，對應平台為 PS4 / Xbox One / PC（Steam）。