【玩物評測】LEGO建築系列帝國大廈開箱

LEGO Architecture 系列下半年產品中，除左之前同大家 Review 過嘅 21045 Trafalgar Square 特拉法加廣場，其實仲有一套 21046 Empire State Building 帝國大廈。Empire State Building 帝國大廈呢個產品主題真係可以話， 2009 年所出品嘅 21002 Empire State Building 只係得 77 件，而今年所出嘅 21046 Empire State Building 係 1767 件！

左：21002 Empire State Building (2009)；右：21046 Empire State Building (2019)

大家對帝國大廈最大印像，唔係比大猩猩 King Kong 爬過之外，另一最大印像當然曾經係全世界最高建築物啦！
喺上世紀入面，帝國大廈係維持最高摩天建築大廈最耐嘅保持者，1931 年落成之後，企足 41 年先比 1972 年落成嘅紐約世貿中心打破。帝國大廈亦喺建造嘅時候打破速度紀錄， 103 層加上天線總高度有 443 米嘅樓高，但只係用左 410 日就完整落成！

21046 Empire State Building – 1767件

盒背都己經見到官方提供嘅對比圖

盒背同時話埋比大家知，55cm高，砌完想擺靚靚就預返啲位啦！

千七件組件就放晒喺呢度！

喺製作書當然奉上帝國大廈背景資料

製作部份今次除左組件量多，還原到帝國大廈嘅宏偉、龐大，同時內、外部份情況都重塑得好好，例如底座上周邊嘅街景、正門側門嘅設計、扶手電梯、屋頂天線下嘅結構等等。

估下呢啲係咩嚟？

其實係紐約市曼哈頓區第 34 街上嘅的士啊(笑)

當中有 8 件鍍銀嘅組件就係代表帝國大廈內 8 條嘅高速扶手電梯，不過可惜係同特拉法加廣場唔同，製作期間見得到佢地之外，之後就一直收埋喺內部

製作方式亦有爆炸性突破，除左好多基本製作技巧之外，今次喺 21046 Empire State Building 我地見到一個製作方式，被玩家們稱之為 Illegal 嘅非官方制作技巧。講緊嘅就係下面圖片所見，將 2×3 嘅平板(tile)攝喺一件 2×3 底板(plate)嘅兩組 Studs 中間！

但其實用平板(tile)攝底板(plate)係允許，不過如果用底板(plate)攝底板(plate)就真係 Illegal 啦！ 21046 Empire State Building LEGO 設計師 Rok Zgalin Kobe 所講，點解會用到呢個咁易被玩家誤會嘅方式，全因為想重現當時 1930 年建造時嘅一個重要建築材料 I-beam，亦即係大家熟識嘅工字鐵。

Rok Zgalin Kobe 喺資料搜集過程當中見好多圖片都有工字鐵嘅出現，用 LEGO 嘅組件喺呢個比例嘅帝國大廈加入工字鐵呢個元素，最終佢就用上呢個罕見技巧！

就咁睇製成品唔覺得有幾震撼呢

咁樣睇係咪明顯睇得到佢 55 cm 嘅龐大！

總結

21046 Empire State Building 喺外觀上可能比大家第一印象冇乜特點，製作過程可能有重覆嘅地方但絕不沉悶。不論你係對 LEGO Architecture 系列產品有興趣，定係想擺件有返咁上下宏偉嘅建築擺設喺屋企，甚或至有啲玩家係睇件數同價錢去考慮值唔值得入手玩嘅情況都好，21046 Empire State Building 係絕對的物有所值！

21046 Empire State Building