今日編輯部出席 PlayStation 香港 2019 年電玩節傳媒導覽會，首次有機會試玩《Final Fantasy 7 Remake》嘅試玩版，可遊玩內容雖然唔算多，只係克羅德同埋巴雷特進入魔晃爐放炸彈嘅呢一段劇情；不過，等咗咁多年終於有機會實機玩到遊戲，作為 Fans，點都係開心的。
第一次公開嘅試玩版，畫面當然係極靚，比起《FF15 》時嘅畫面再更上一層樓；人物模組細緻則在意料之內，畢竟 SE 喺《FF》系列好少會喺呢啲位令人失望；背景音樂用上全新編制方式，如果玩過原作嘅朋友，應該喺步入魔晃爐嗰一刻已經「咩回憶都返哂黎」！
不過，操作模式就同我想像中有少少唔同，大家事前都預料《FF7 Remake》會完全起用《FF15》嗰種戰鬥方式，結果，今次實機試玩過後發現，兩者嘅戰鬥模式，係頗為唔同的。
或者係想保留《FF7》嗰種要揀 Command 入指令嘅元素，《FF7 Remake》今次試玩裡面，無得玩連招、無得玩駁技，玩家進行普通攻擊會儲到「Command Bar」，一旦「Command Bar」儲滿，就可以進入選單揀選出「戰技」或者「魔法」；而同《FF7》一樣，玩家累積傷害到一定程度，就會爆「Limit」，可以出「Limit 技」，例如係克羅德嘅「凶斬」。
玩家進入 Command 界面時，戰鬥畫面會減慢，戰鬥中亦可以按「上」或「下」轉換操作角色。
呢種操作方式，並唔係話有咩唔好，不過似乎 SE 想將《FF7》裡面嘅「傳統指令戰鬥元素」套用到呢隻《FF7 Remake》裡面，試玩時間短暫，所以感覺有點兒彆扭；又，畢竟呢個只係第一個試玩，所以攻擊感還好，不過流暢度及爽快度方面，就似乎有改善提昇空間。
由於呢個試玩版係首次對外公開，所以今日唔可以為大家提供實機試玩截圖；如果你有興趣試玩《FF7 Remake》，黎緊 7 月 26～30 日於會展舉行嘅香港電玩節將會現場提供試玩！各位朋友可以到時實機感受下個遊玩感覺。
相關文章：
【PR】PlayStation 2019 動漫節優惠消費攻略＋《FF7 Remake》亞洲首度公開試玩
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。