喺 2015 年展開眾籌嘅《莎木 3》初頭的確係威係勢，我地編輯部都有人比錢支持並且滿心期待。但當每次有新片發佈，都叫一眾 Fans 失望。據了解身邊一眾 Fans 朋友大多數都係靠對系列嘅愛黎支持，對作品嘅要求已經降到去有得玩就算。但勢估唔到，不論係製作人鈴木裕又或者發行商 Deep Silver 都扭盡六壬去激嬲各位支持者，最新力作就係「你有份支持但唔代表你有預購獎勵」！

最近《莎木 3》嘅 Kickstarter 入面嘅更新日誌討論區，就有一位叫做 Antonio Miranda 嘅網友，表示佢收到一份黎自《莎木 3》 YS Net 官方郵件，入面嘅內用大意上係：

「通過零售銷售發布嘅標準及豪華版本與眾籌活動無關，所以眾籌支持者獎勵並不包括在內，不過玩家可以分開購買此獎勵。當然，眾籌支持者用戶可以將會得到 Kickster 或者 Slacker 眾籌支持者版本，並會得到獨有專屬內容，而零售版則沒有此內容，當然亦不包括季票在內。」

 

亦即係話，即使閣下係有參與眾籌，不過你並唔會得到全部嘅獎勵，想要預購獎勵的話麻煩自己比錢買。經驗所得，一般呢類獎勵都係啲雞肋野，或者係服裝之類物品，而且認真講的話眾籌的確係唔等同預購的。

不過回想返之前承諾推出時會有 Steam 版本，之後又反口話由附送木馬程式嘅「Epic Game Store」獨佔，仲曾經話過唔會退款，引起種種風波之後你仲要做埋呢種行為，真係非常之小家。唔好忘記如果無一眾眾籌支持者，可能就無《莎木 3》嘅出現，呢種過橋抽板嘅行為的確可圈可點，距離遊戲正式推出仲有四個月，越黎越期待官方仲有咩板斧去辣㷫玩家。

附帶一提，編輯部已經無人想玩《莎木 3》了。