香港近年黎因為社會充斥住各種不公，政制倒退，警察濫權等現象，令到「示威」呢個活動經常性出現。睇就睇得多，又有無諗過有遊戲教埋你示威者要做乜 ？今次我地介紹嘅呢款遊戲《RIOT – Civil Unrest 》，早於今年二月推出，遊戲入面玩家可以體驗世界各地發生嘅真實事件，從中了解各種示威戰術！

遊戲中玩家可以到四件真實嘅社會事件，當中包括阿拉伯之春、意大利反高鐵衝突、西班牙 15-M 運動以及希臘反對非法興建堆填區示威（無烏克蘭親歐盟示威運動好可惜）。玩家可以選擇扮演示威者或者警方，而每個事件每個關卡都會有獨特嘅場景、道具等，令玩家了解到事件發生嘅過程。

如果出香港 DLC，相信會係地獄級難度

劇情模式之外，仲有世界模式，地圖頗多

扮演示威者一方嘅玩家，可以對每支部隊下達命令，一般黎講都係行前行後，唱下歌仔谷士氣之類。但係即使係和平示威者，亦都會因應情況轉為可使用武力嘅「暴徒」。變成「暴徒」後，將增加攻擊類型指令，前期只有掉石頭、彈弓、自製煙霧彈、炮仗等道具，隨住劇情通關將可解鎖汽油彈等更高武力道具。

戰術上盡量用和平抗爭手法，因為全世界都有種潔癖，覺得「暴力就唔啱」

雖然有得使用武力，但係並非無顧慮的，因為遊戲有輿論系統。如果玩家使用過度武力，將會喪失民意支持，反之如果警方使用過度武力，輿論則會偏向示威者一方，從而於下一局遊戲中增強示威者嘅反制力量，不過遊戲就無設定由政權主導嘅輿論，望返香港現時面對嘅情況似乎更為嚴峻。

玩家隨時可轉換為「攻擊模式」，對抗瘋狂嘅警察

轉成攻擊模式（港譯：衝衝子）後，基本攻擊變成掉石仔，仲有各種如色彈等道具，最真實嘅係有得砌路障（仲可以點火燒路障）。

無論作出咩行動，都需要輿論支持

除咗示威者之外，玩家亦可以選擇扮演警察一方去打爆手無寸鐵嘅市民。警察主要分為三種：帶防暴盾負責喺前線隔離人群嘅警察、負責衝入人群暴打市民然後逮捕嘅速龍小隊以及配備摧淚彈等武器嘅特殊警察。

同示威者一樣，警察可以選擇對群眾使用不同程度嘅武力，當然如果施加過份暴力的話，示威者 AI 會被激怒，從而使用更暴力手段還擊，而示威者人數往往係幾倍於警察的，當然輿論亦會更偏向支持示威者一方。

當試玩警察一方，你就會明白佢地心中只有「殲滅」、「毆打」、「逮捕」呢啲選項

對住人多嘅地方射摧淚彈是常識吧。

可以淨係影部份畫面，製做假象引導輿論

不顧一切鎮壓，係咪好有香港味呢？

《RIOT – Civil Unrest 》真實性十足，教導示威者有咩係應該做，有咩做完之後會引起輿論反彈。同時亦真實地展現不論邊個地方，警察都只係當權者嘅工具，並無人性可言。

現時呢款遊戲係 Steam 上面做緊特價，只需要 HKD $41.00 就有，另外本作仲有PS4、Nintendo Switch 版本，不過二者都無對應中文，有興趣嘅朋友留意下啦！

《RIOT – Civil Unrest 》 Steam 傳送門