早在 E3 2017 時，德國遊戲工作室 Crytek 公佈左一隻名為《Hunt: Showdown（惡靈獵殺：緊要關頭）》嘅射擊遊戲，而《Hunt: Showdown》亦於 2018 年 8 月 23 日時登錄 Steam 平台；事隔一年，官方宣佈遊戲亦將會於今年秋季登錄 PS4 平台。

《Hunt: Showdown》以維多利亞時期 19 世紀末作為遊戲背景，地點為美國路易斯安那州，舞台設定為被怪物侵佔而變成廢墟嘅城鎮，附近仲有大量森林以及沼澤，玩家要做嘅就係獵殺呢啲怪物、搵出元兇；但係，因為會有其他玩家同時與你競爭，所以其他玩家都會係你嘅敵人！

玩家飾演賞金獵人進行「獵巫行動」，正如頭先所講，遊戲惹人注目之處係玩法係「PvPvE」，即係同時具有「PvP」以及「PvE」元素。玩家將會兩人一組，可以單獨 Team Play，亦可以加入為數 10 人嘅 Match，以擊倒怪物為目標，之後領取獎勵。

一旦擊倒 Boss 目標怪物，其他同場玩家就會收到通知「獎勵在某玩家手上」，之後嘅玩法就會變成盡快脫出，因為其他玩家會開始黎搶奪你嘅獎勵！

除左 Boss 級頭目以外，遊戲中出現嘅怪物亦都非常多樣，例如「Grunt」係喪屍化嘅人類、「Hive」係身體裡面有巢，會不斷飛出毒蟲嘅怪物、「Meathead」係無頭人。每種怪物都有唔同特性，不過共通點係聽覺靈敏，會因為玩家嘅腳步聲、或者攻擊聲而進行反擊。

遊戲自從喺 Steam 上面推出以來，已經有超過 20 次嘅 Update，無論係地圖、模式、武器都有非常豐富嘅變化，黎緊今年成個 package 落 PS4，唔知會唔會掀起新一輪射擊遊戲熱潮。

有最新消息我地會再同大家分享，想玩 Steam 版嘅朋友可以參考以下傳送門；PS4 版用家就同我地一齊等待新消息公佈吧。

【Steam 版傳送門】